Xorijdagi 159 276 nafar O‘zbekiston fuqarolari referendumda muddatidan oldin ovoz berdi. Bu haqda Tashqi ishlar vazirligi axborot xizmati maʼlum qildi.
Xabarga ko‘ra, O‘zbekistonning xorijdagi elchixona va Bosh konsulxonalari tomonidan 19-26-aprel kunlari referendumning muddatidan oldin ovoz berish jarayonlari amalga oshirildi. O‘zbekiston fuqarolari zich joylashgan 40 ta xorijiy davlatda, jumladan diplomatik vakolatxonalar mavjud bo‘lmagan shaharlarda qo‘shimcha ravishda jami 1003 ta muddatdan oldin ovoz berish nuqtasi tashkil etildi.
Ushbu muddatdan oldin ovoz berish jarayonida 159 276 nafar fuqaro o‘z konstitutsiyaviy huquqlaridan foydalandi. Xorijdagi vakolatxonalar tomonidan muhim siyosiy tadbirni yuqori saviyada o‘tkazish maqsadida vatandoshlar, xorijiy ommaviy axborot vositalari va chet el rasmiylari ishtirokida 500 dan ziyod tushuntirishlar, brifing va uchrashuvlar tashkil qilindi.
Hozirgi vaqtda O‘zbekistonning diplomatik vakolatxonalari va konsullik muassasalari mavjud bo‘lgan 39 ta davlatda 55 ta referendum uchastkasi tashkil etilgan. Xorijdagi referendum jarayonlarining dastlabkisi 30-aprel kuni Yaponiya va Koreyadagi diplomatik vakolatxonalarda Toshkent vaqti bilan soat 04:00 da boshlanib, so‘nggisi Amerika Qo‘shma Shtatlaridagi vakolatxonalarda 1-may kuni soat 05:00 da yakunlanishi maʼlum qilindi.
Hozirgi vaqtda mamlakatning Sharq va Osiyo mamlakatlaridagi diplomatik vakolatxonalarida, xususan, Yaponiya, Koreya, Singapur, Malayziya, Indoneziya, Hindiston, shuningdek, Rossiyaning Vladivostok, Novosibirsk, Yekaterinburg shaharlarida hamda qo‘shni mamlakatlarda ovoz berish jarayoni boshlandi.
Izoh (0)