Keyingi paytlarda hajviy masallarni o‘qib, tomoshabinlar e’tiboriga tushayotgan yosh aktrisa Dilshoda Rustamjonova “Daryo”ning YouTube’dagi kanaliga intervyu berdi. U partnyori Shahboz Sattorov bilan tanishuvi, kastinglardan o‘tolmagani va hayosiz novelladagi roli uchun ota-onasidan kechirim so‘rashi haqida gapirdi.
— Shahboz aka bilan tanishuvimiz juda oddiy kechgan. Hajviy ko‘rsatuvda birga ishtirok etganimizdan keyin Instagram orqali “Aka-singil sifatida vaynlar suratga olsak, nima deysiz?” deb xabar jo‘natdi. U paytda Shahboz akaning Instagram’dagi obunachilari u qadar ko‘p emasdi. Ammo u yaxshi aktyor bo‘lish bilan birga ijodiy g‘oyalarga boy ekanligini yaxshi bilardim. Shu bois taklifni jon deb qabul qilganman. Menimcha, ikkimiz yaxshi tandem bo‘lolganmiz. Katta aka bilan kichkina qaysar singil sarguzashtlari odamlarga ham yoqqan. Keyin orada bir necha oy hamkorligimiz uzildi. Ular ham, men ham video olishga harakat qilmadik. Bir qarasa, kuniga 9-10 ta video suratga olamiz. Ba’zida esa oylab birorta video ololmaydigan kunlarimiz ham bo‘ladi, — deydi aktrisa.
Ko‘pchilik Dilshoda Rustamjonovaning onasini ham aktrisa deb o‘ylashadi. Ammo onasi musiqa o‘qituvchisi, uning ekrandagi “onasi” esa aktrisa Nodira Murtazayeva bo‘ladi.
— San’atkor bo‘lishimga qarshiliklar juda ko‘p bo‘lgan. Keyinchalik dadam qo‘llab-quvvatlagandan keyin bobom ham qarshilik qilmagan. San’atga bo‘lgan qiziqishim sabab qayerda kasting bo‘layotganini eshitsam, albatta yetib borardim. Chunki meni bu borada qo‘llab-quvvatlaydigan ishongan insonim yo‘q edi. Ammo iste’dodli bo‘lganingiz bilan sizni qo‘llab-quvvatlaydigan inson bo‘lmasa, juda qiyin. Deyarli juda ko‘p kastinglardan o‘tmaganman. Ammo hech umidimni uzmasdim. “Aktrisa bo‘lish uchun chiroyli bo‘lish kerak”, deb tashqi ko‘rinishimga e’tiroz bildirilgan paytlar ham ko‘p bo‘lgan. Ana o‘sha vaqtdagi gaplar ko‘nglimga juda og‘ir botardi, ammo o‘zimni qo‘lga olib, kulib chiqib ketardim. Munisa Rizayevaning ilk yakkaxon konsertidagi kichik sahna ko‘rinishida ishtirok etganman. Menga umuman haq to‘lanmagan, ammo juda xursand bo‘lganman. Bu eng katta muvaffaqiyatim edi, — deydi aktrisa Dilshoda Rustamjonova.
Aktrisa tanilish uchun hayosiz telenovellada suratga tushishga rozi bo‘lgani va buning uchun ota-onasidan uzr so‘rashi haqida aytib o‘tdi.
— Bu rolga taklif etishganida YouTube uchun suratga olinarkan-ku, deganman. Bu qadar tez tarqalib ketib, tanqidlarga sabab bo‘lishi haqida o‘ylab ham ko‘rmabman. Yashirmayman, u paytda juda yosh, bor-yo‘g‘i 16 yoshdagi qiz edim. “Tanilsam bo‘ldi”, deb o‘ylaganman, xolos. O‘sha paytda ham bo‘lajak turmush o‘rtog‘im bilan tanish edim. Rol borasida u bilan maslahatlashganman, “Yo‘q, bu rolni o‘ynamaysan” deb qarshilik qilgan. Rejissor esa hayosiz sahnalarni boshqa aktrisa ijro etishini aytgandan keyin rolga rozi bo‘lgan. Haqiqatan ham hayosiz sahnalardagi aktrisa men emasman. Ammo buni tomoshabinlarga tushuntirib bo‘lmaydi. Rosti, bu rol uchun uyalmayman, ammo ota-onamdan kechirim so‘rayman. Balki otamning ham ko‘nglidan nimalardir o‘tgandir, ammo bu haqida menga gapirmagan. Onam esa “Bunday rollarni o‘ynama, qizim”, deb yig‘lagan, — deydi aktrisa Dilshod Rustamjonova.
Aktrisa bilan bo‘lgan qiziqarli suhbatni quyida tomosha qilishingiz mumkin.
Izoh (0)