“Ҳаёсиз ролимни кўриб, онам йиғлаган” — Дилшода Рустамжонова кастинглардан ўтмагани ва танилиш учун қилган хатоликлари ҳақида (видео)

Кейинги пайтларда ҳажвий масалларни ўқиб, томошабинлар эътиборига тушаётган ёш актриса Дилшода Рустамжонова “Дарё”нинг YouTube’даги каналига интервью берди. У партнёри Шаҳбоз Сатторов билан танишуви, кастинглардан ўтолмагани ва ҳаёсиз новелладаги роли учун ота-онасидан кечирим сўраши ҳақида гапирди.

— Шаҳбоз ака билан танишувимиз жуда оддий кечган. Ҳажвий кўрсатувда бирга иштирок этганимиздан кейин Instagram орқали “Ака-сингил сифатида вайнлар суратга олсак, нима дейсиз?” деб хабар жўнатди. У пайтда Шаҳбоз аканинг Instagram’даги обуначилари у қадар кўп эмасди. Аммо у яхши актёр бўлиш билан бирга ижодий ғояларга бой эканлигини яхши билардим. Шу боис таклифни жон деб қабул қилганман. Менимча, иккимиз яхши тандем бўлолганмиз. Катта ака билан кичкина қайсар сингил саргузаштлари одамларга ҳам ёққан. Кейин орада бир неча ой ҳамкорлигимиз узилди. Улар ҳам, мен ҳам видео олишга ҳаракат қилмадик. Бир қараса, кунига 9-10 та видео суратга оламиз. Баъзида эса ойлаб бирорта видео ололмайдиган кунларимиз ҳам бўлади, — дейди актриса.

Кўпчилик Дилшода Рустамжонованинг онасини ҳам актриса деб ўйлашади. Аммо онаси мусиқа ўқитувчиси, унинг экрандаги “онаси” эса актриса Нодира Муртазаева бўлади.

— Санъаткор бўлишимга қаршиликлар жуда кўп бўлган. Кейинчалик дадам қўллаб-қувватлагандан кейин бобом ҳам қаршилик қилмаган. Санъатга бўлган қизиқишим сабаб қаерда кастинг бўлаётганини эшитсам, албатта етиб борардим. Чунки мени бу борада қўллаб-қувватлайдиган ишонган инсоним йўқ эди. Аммо истеъдодли бўлганингиз билан сизни қўллаб-қувватлайдиган инсон бўлмаса, жуда қийин. Деярли жуда кўп кастинглардан ўтмаганман. Аммо ҳеч умидимни узмасдим. “Актриса бўлиш учун чиройли бўлиш керак”, деб ташқи кўринишимга эътироз билдирилган пайтлар ҳам кўп бўлган. Ана ўша вақтдаги гаплар кўнглимга жуда оғир ботарди, аммо ўзимни қўлга олиб, кулиб чиқиб кетардим. Муниса Ризаеванинг илк яккахон концертидаги кичик саҳна кўринишида иштирок этганман. Менга умуман ҳақ тўланмаган, аммо жуда хурсанд бўлганман. Бу энг катта муваффақиятим эди, — дейди актриса Дилшода Рустамжонова.

Актриса танилиш учун ҳаёсиз теленовеллада суратга тушишга рози бўлгани ва бунинг учун ота-онасидан узр сўраши ҳақида айтиб ўтди.

— Бу ролга таклиф этишганида YouTube учун суратга олинаркан-ку, деганман. Бу қадар тез тарқалиб кетиб, танқидларга сабаб бўлиши ҳақида ўйлаб ҳам кўрмабман. Яширмайман, у пайтда жуда ёш, бор-йўғи 16 ёшдаги қиз эдим. “Танилсам бўлди”, деб ўйлаганман, холос. Ўша пайтда ҳам бўлажак турмуш ўртоғим билан таниш эдим. Рол борасида у билан маслаҳатлашганман, “Йўқ, бу ролни ўйнамайсан” деб қаршилик қилган. Режиссёр эса ҳаёсиз саҳналарни бошқа актриса ижро этишини айтгандан кейин ролга рози бўлган. Ҳақиқатан ҳам ҳаёсиз саҳналардаги актриса мен эмасман. Аммо буни томошабинларга тушунтириб бўлмайди. Рости, бу рол учун уялмайман, аммо ота-онамдан кечирим сўрайман. Балки отамнинг ҳам кўнглидан нималардир ўтгандир, аммо бу ҳақида менга гапирмаган. Онам эса “Бундай ролларни ўйнама, қизим”, деб йиғлаган, — дейди актриса Дилшод Рустамжонова.

Актриса билан бўлган қизиқарли суҳбатни қуйида томоша қилишингиз мумкин.