Ayni kunlarda “Million” jamoasining yubiley konsert dasturiga tayyorgarlik ko‘rayotgan Davron Kabulov “Daryo” jurnalistiga bergan intervyusida soqolga qo‘yilayotgan cheklovlar, sahna orti muammolari va bu yilgi dastur haqida aytib o‘tdi.
— “Xalqlar do‘stligi” san’at saroyi tomonidan san’atkorlarning soqoliga qo‘yilayotgan e’tirozlar asossiz deyolmayman. Betartib soqol masalasi nafaqat san’at saroyida, balki ko‘cha-kuyda ham gapirilmoqda. To‘g‘ri, soqol qo‘yish har bir insonning e’tiqodi bilan bog‘liq masala. Ammo madaniyat saroyi tomonidan muayyan me’yorlar qo‘yilgan bo‘lsa ularga ham amal qilishimiz kerak. Har bir dargohning o‘z qonun qoidalari bor. Hatto uyimizga kelgan mehmon ham uyimizdagi qonun-qoidalarga amal qiladi.
“Soqolni faqat dindorlar qo‘yadi”, degan fikrga qo‘shilmayman. Ko‘chaga chiqib ahamiyat beradigan bo‘lsak soqol musulmonda ham, xristianda ham va yahudiyda ham bor. Hatto, Timatining muxlisi ham soqol qo‘yishi tabiiy hol. Shundan kelib chiqqan holda madaniyat saroyi va bu soha rahbarlari bilan kelishuvga kelinadi degan umiddaman. Masalan, biz bilan xonanda Shohruhxoning 20 yildan buyon soqoli bor, bu uning imidji hisoblanadi. Hozir sallani desa kallani olib kelib, san’atkorlarning imidji ekanligiga e’tibor bermayotgan ba’zi insonlarning harakatida ma’no yo‘q deb o‘ylayman. Keyin soqolga bu darajada siyosiy tus berilishini ham xohlamagan bo‘lardim, — deydi Davron Kabulov.
Davron Kabulov “Million” jamoasi sardori ekanligidan tashqari, konsertning tashkiliy ishlari bilan ham shug‘ullanadi. U nega bu ishni boshqalarga topshirmasligining sababini quyidagicha izohladi.
— Boshqa inson siz nima xohlayotganingizni bilmaydi. Keyin tashkilotchi ijodkordek jon kuydirmaslik ehtimoli ham bor. Ammo kelasi konsertdan boshlab qog‘ozbozlik ishlarini boshqa yordamchilarga topshirishni reja qildim. Shunda sahnada ko‘proq ishlashimga imkon bo‘ladi, — deydi Davron Kabulov.
U “Xalqlar do‘stligi” san’at saroyining ijara xarajati keskin oshirilgani va xarajatlarni qoplash qiyin bo‘layotgani haqida ham aytib o‘tdi.
— 2021-yil saroyning bir kunlik ijarasi 25 million so‘m edi. 2022-yilda ijara narxi 40 millionga oshirildi. Hozir esa bu narx 65 million so‘m etib belgilangan. Deyarli bir yarim yil ichida ijara narxi ikki barobardan ham ko‘proqqa oshirildi. Ammo tashkilotchilar biletni oshirgani yo‘q. Agar shunday qiladigan bo‘lsa jabrini oddiy xalq tortadi. Bir-ikki kun konsert beradigan ijodkorlar “muxlislarim biletni amallab olishadi” deb o‘ylashar. Ammo 10 kun konsert beradigan konsert tashkilotchilarida bu jarayon juda qiyin kechadi. Saroy ijarasidan tashqari, soliq, dekoratsiya, chiroq, ovoz kuchaytirish uskunalari va aktyorlar gonorarini hisoblaydigan bo‘lsak tashkilotchilar hech qancha foyda qilayotgani yo‘q. Menimcha, konsert tashkilotchilariga ozgina yengillik berish kerak. Mana o‘zbekkinosini obdan tiz cho‘ktirib achinarli ahvolga olib kelishdi va bugungi kunda tomoshabinni kinosaroylarga qaytarish uchun million-million mablag‘ sarflashyapti. Konsert tomoshabinlarni ham saroylardan uzoqlashtirmay, tashkilotchi va ijodkorlarga yengillik berish kerak.
Yashirmayman, foyda tugul zarar bilan chiqqan konsertlarimiz ham bor. Chunki konsert berish ham bir tavakkal, undan foyda olish yoki zarar ko‘rishni oldindan aytib bo‘lmaydi, — deydi Davron Kabulov.
Ijodkor bu yilgi konsertda kimlar ishtirok etishi va tayyorgarlik jarayonlari qanday kechayotganini ham ochiqladi.
— 10 yillik yubiley konsertga jiddiy tayyorgarlik ko‘ryapmiz. U har galgidan boshqacha bo‘lishi aniq. Bir sirni ochishim mumkin, bir sahnaga 120 dan ortiq ishtirokchi chiqadi. Balki eski tarkibdagi ijodkorlar ham ishtirok etishar, — deydi Davron Kabulov.
To‘liq videoni quyida tomosha qilishingiz mumkin.
Izoh (0)