O‘zbekistonda moliyaviy piramida orqali tanilgan Ahmadboy (Ahmadjon Tursunboyev) haqida serial suratga olindi. Bu haqda “Mening yurtim” telekanali bosh direktori Qobuljon Ahmedov “Daryo”ga ma’lum qildi.
Ma’lum qilinishicha, telekanal buyurtmasi bilan “Piramida” teleseriali suratga olingan va may oyidan boshlab efirga uzatish rejalashtirilgan.
Qobuljon Ahmedovning so‘zlariga ko‘ra, Ahmadboy rostdan ham prototiplardan biri sifatida olingan, undan tashqari boshqa moliyaviy piramidalar, masalan, mashina olib berishni vaʼda qilgan “Avtohamkor 60” kabilar ham olingan. Ta’kidlanishicha, serialda jinoyatchilar ideallashtirilmaydi, aksincha, jinoyat jazosiz qolmasligi anglashiladi.
“Serial olishdan maqsad – tekin pishloq faqat qopqonda bo‘lishini, tezda boyib ketish fikri bilan yashayotgan odam o‘zida boriniyam boy berishi mumkinligini aholiga tushuntirish, moliyaviy piramida insonlarning taqdirini ayanchli tusga olib kelishi, piramidachilar bir kun kelib qonun oldida, albatta, javob berishini, yurtimizda xalqimizning manfaatini o‘ylaydigan, noqonuniy ishlarni kuzatib turgan va vaqtida oldini oladigan fidoyi organ xodimlari borligini ko‘rsatishdan iborat”, — deydi Ahmedov.
Shu bilan birga telekanal bosh direktori “Piramida” – bu “Shaytanat” emasligi va uni taqqoslamaslik lozimligini qayd etgan.
Ahmadboy kim?
2016-yilning 15-iyun kuni Ahmadjon Tursunboyev — to‘rt-besh yil davomida bir necha o‘n ming odamni qamrab olgan “moliyaviy piramida” asoschisi — chinozlik Ahmadboy qo‘lga olingan edi. U ikki barobar qilib qaytarish va’dasi bilan avtomobillar, qoramol, juda katta miqdordagi omonat mablag‘larni milliy va xorijiy valyutada qabul qilish bilan noqonuniy ravishda shug‘ullanib kelgan.
Shov-shuvga sabab bo‘lgan mazkur voqea yuzasidan televideniye orqali namoyish etilgan maxsus ko‘rsatuvlarda dastlabki surishtiruv ishlari davomida Ahmadboy va uning yaqinlari xonadonlaridan naqd 13,1 milliard so‘m va 12 million dollar topilgani aytilgan. Uning qo‘lida g‘aznachi bo‘lib ishlagan shaxslardan biri “kunlik pul aylanmasi 3-4 milliard so‘mni, AQSh dollarida 1 million atrofidagi summani tashkil etgani”ni ma’lum qilgan edi.
Ahmadboy bir o‘zi ishlamagan — uning bir qator yordamchilari, shuningdek, undan ilhom olgan izdoshlari ham bo‘lgan. Ahmadboyning qo‘lga olinishiga bag‘ishlangan maxsus ko‘rsatuvda “uning yo‘li”dan borgan Nuriddin Abulg‘oziyev, Quvonchbek Abdulqosimov qo‘lga olingan.
2014-yilda Ahmadjon Tursunboyevga Jinoyat kodeksining 59-moddasi 8-qismi va 61-moddalari tartibida tayinlangan jazoga qisman jinoyat ishlari bo‘yicha Toshkent viloyat sudining 2019-yil 20-maydagi hukmi bilan tayinlangan jazosini qo‘shib, uzil-kesil o‘tash uchun 1 yil muddatga tadbirkorlik bilan shug‘ullanish huquqidan mahrum qilgan holda 14 yil 3 oy ozodlikdan mahrum qilish hamda eng kam oylik ish haqining 400 baravari miqdorida 52 096 000 so‘m jarima jazolari tayinlandi.
Izoh (0)