Farg‘ona viloyati Beshariq tumanidagi 2-umumtaʼlim maktabining 11-sinf o‘quvchisi Abdulloh Muhammadov muddatidan avval 11 ta xorijiy oliy taʼlim muassasasi talabasiga aylandi. Bu haqda “Daryo” muxbiri xabar berdi.
Abdulloh AQSH, Malayziya, Shveysariya singari davlatlardagi oliygohlarning 1 mln dollardan ortiq miqdordagi grant mablag‘larini qo‘lga kiritgan. Ular orasida AQSHdagi nufuzli Austin College, Franklin University, Florida Tech Institute, University of Evansville oliygohlar ham bor.
Abdulloh matematika va ingliz tilidan 1110 ball to‘plab, xalqaro SAT sertifikatiga ega bo‘lgan. Bundan tashqari, ilk urinishda IELTSdan 6,5 ball olgan.
“IELTS sertifikatini olish uchun uch oy davomida tayyorgarlik ko‘rdim. To‘g‘risi, imtihonga yetarlicha tayyorgarlik ko‘ra olmadim, deb hayajonga tushib qoldim. Shuning uchun ilk urinishdagi natijalarim yuqori chiqmadi — IELTSdan 6,5 ball oldim. Albatta, qayta imtihon topshirib, yana yuqoriroq ball to‘plashim mumkin edi. Lekin men qaytadan IELTS topshirishni o‘rniga SAT imtihoniga tayyorlandim. Matematika va ingliz tilidan 1110 ball to‘plab, xalqaro SAT sertifikatini qo‘lga kiritdim. Bu natija menga AQSHning top universitetlariga hujjat topshirishim uchun yetarli bo‘ldi.
Jami 20 ta xorijiy OTMga hujjat topshirganman. Hozirgacha ularning 13 tasidan javob keldi. Bu universitetlardan har xil miqdorda grant yutganman. 13 ta OTMdan qo‘lga kiritgan grantlarimning umumiy miqdori 1 mln dollardan oshgan. Bularning qatorida AQSHdagi top yuztalikka kiradigan universitetlar ham bor.
O‘zim jahon reytingida 72-o‘rinda turadigan Austin Collegeda kompyuter texnologiyalari yo‘nalishida taʼlim olmoqchiman. IT yo‘nalishini tanlashimga sabab, hozirda O‘zbekistonda prezidentimiz bu sohaga juda katta eʼtibor qaratyaptilar. Toshkentda katta-katta IT parklar ochilyapti. Xorijning nufuzli universitetlarida o‘qib, kelajakda O‘zbekistonning rivojlanishiga o‘z hissamni qo‘shish niyatidaman”, — deydi Abdulloh Muhammadov.
Izoh (0)