Ўзбекистонда молиявий пирамида орқали танилган Аҳмадбой (Аҳмаджон Турсунбоев) ҳақида сериал суратга олинди. Бу ҳақда “Менинг юртим” телеканали бош директори Қобулжон Аҳмедов “Дарё”га маълум қилди.
Маълум қилинишича, телеканал буюртмаси билан “Пирамида” телесериали суратга олинган ва май ойидан бошлаб эфирга узатиш режалаштирилган.
Қобулжон Аҳмедовнинг сўзларига кўра, Аҳмадбой ростдан ҳам прототиплардан бири сифатида олинган, ундан ташқари бошқа молиявий пирамидалар, масалан, машина олиб беришни ваъда қилган “Автоҳамкор 60” кабилар ҳам олинган. Таъкидланишича, сериалда жиноятчилар идеаллаштирилмайди, аксинча, жиноят жазосиз қолмаслиги англашилади.
“Сериал олишдан мақсад – текин пишлоқ фақат қопқонда бўлишини, тезда бойиб кетиш фикри билан яшаётган одам ўзида бориниям бой бериши мумкинлигини аҳолига тушунтириш, молиявий пирамида инсонларнинг тақдирини аянчли тусга олиб келиши, пирамидачилар бир кун келиб қонун олдида, албатта, жавоб беришини, юртимизда халқимизнинг манфаатини ўйлайдиган, ноқонуний ишларни кузатиб турган ва вақтида олдини оладиган фидойи орган ходимлари борлигини кўрсатишдан иборат”, — дейди Аҳмедов.
Шу билан бирга телеканал бош директори “Пирамида” – бу “Шайтанат” эмаслиги ва уни таққосламаслик лозимлигини қайд этган.
Аҳмадбой ким?
2016 йилнинг 15 июнь куни Аҳмаджон Турсунбоев — тўрт-беш йил давомида бир неча ўн минг одамни қамраб олган “молиявий пирамида” асосчиси — чинозлик Аҳмадбой қўлга олинган эди. У икки баробар қилиб қайтариш ваъдаси билан автомобиллар, қорамол, жуда катта миқдордаги омонат маблағларни миллий ва хорижий валютада қабул қилиш билан ноқонуний равишда шуғулланиб келган.
Шов-шувга сабаб бўлган мазкур воқеа юзасидан телевидение орқали намойиш этилган махсус кўрсатувларда дастлабки суриштирув ишлари давомида Аҳмадбой ва унинг яқинлари хонадонларидан нақд 13,1 миллиард сўм ва 12 миллион доллар топилгани айтилган. Унинг қўлида ғазначи бўлиб ишлаган шахслардан бири “кунлик пул айланмаси 3-4 миллиард сўмни, АҚШ долларида 1 миллион атрофидаги суммани ташкил этгани”ни маълум қилган эди.
Аҳмадбой бир ўзи ишламаган — унинг бир қатор ёрдамчилари, шунингдек, ундан илҳом олган издошлари ҳам бўлган. Аҳмадбойнинг қўлга олинишига бағишланган махсус кўрсатувда “унинг йўли”дан борган Нуриддин Абулғозиев, Қувончбек Абдулқосимов қўлга олинган.
2014 йилда Аҳмаджон Турсунбоевга Жиноят кодексининг 59-моддаси 8-қисми ва 61-моддалари тартибида тайинланган жазога қисман жиноят ишлари бўйича Тошкент вилоят судининг 2019 йил 20 майдаги ҳукми билан тайинланган жазосини қўшиб, узил-кесил ўташ учун 1 йил муддатга тадбиркорлик билан шуғулланиш ҳуқуқидан маҳрум қилган ҳолда 14 йил 3 ой озодликдан маҳрум қилиш ҳамда энг кам ойлик иш ҳақининг 400 баравари миқдорида 52 096 000 сўм жарима жазолари тайинланди.
Изоҳ (0)