Самарқанд аэропорти Европанинг йирик авиакомпаниялари билан рейслар очиш бўйича музокаралар олиб бормоқда. Бу ҳақда Air Marakanda бош директорининг алоқалар бўйича ўринбосари Мария Шаравинага таяниб, “РИА Новости” хабар берди.
Қайд этилишича, ҳозирда Самарқанддан Европага рейслар йўқ. Компания Европанинг йирик авиакомпаниялари билан Европа давлатларидан Самарқандга рейслар очиш бўйича музокаралар олиб бормоқда.
Бундан ташқари, яқин келажакда Air Samarkand Европа йўналишлари ҳамда Яқин Шарқ ва Жануби-Шарқий Осиё мамлакатларига йўналишларни қамраб олишни режалаштирган.
Шаравина йил бошидан буён аэропорт Россия шаҳарларига ҳам парвозлар дастурини сезиларли даражада оширгани, хусусан, Қозон, Уфа, Сочи, Самара, Минералниэ Водига тўғридан тўғри рейслар очилгани, Санкт-Петербург, Новосибирск, Москвага парвозлар частотаси кўпайтирилганини қўшимча қилган.
Шунингдек, 21 апрель куни Россиянинг “Победа” лоукостери Москвадан илк парвозини амалга оширган, у Самарқандга ҳафтасига икки марта парвоз қилишни режалаштирмоқда.
Самарқанд халқаро аэропорти
2022 йил 18 март куни аэропорт мажмуасининг тантанали очилиш маросими бўлиб ўтган эди. Янги терминал қуриш лойиҳаси Air Marakanda ва давлат ҳамкори Uzbekistan Airports ўртасида Ўзбекистон авиация тарихидаги биринчи давлат-хусусий шериклик келишуви доирасида амалга оширилди.
Янги терминал режалаштирилган рейслар сонини ҳафтасига 40 тадан 120 тагача ошириш имконини беради, перроннинг модернизация қилиниши эса самолёт қўниш жойлари сонини 24 тага етказди. Uzbekistan Airports бошқарув кенгаши раиси Раъно Жўраевага кўра, Самарқанд халқаро аэропорти лойиҳаси 150 миллион долларга тушган.
Изоҳ (0)