Россия президенти матбуот котиби Дмитрий Песковнинг ўғли Николай “Вагнер” хусусий ҳарбий компанияси таркибида уруш зонасида хизмат қилганини тасдиқлади. Бу ҳақда “Комсомолская правда” хабар берди.
“Вагнер” асосчиси Евгений Пригожин аввалроқ Николай Песковнинг уруш зонасидаги иштироки ҳақида гапирганди. Николай “ҳарбий амалиётда” қатнашиш қарорини “ўз бурчи” деб билиши ва “четда ўтира олмаслиги” билан изоҳлади. У оиласи, шу жумладан, отаси ҳам буни қўллаб-қувватлаганини айтди.
“Maxсус ҳарбий операцияда қатнашишга қарор қилганимда, у ерга қандай боришни билмасдим. Шундай қилиб, отамга мурожаат қилишимга тўғри келди. Ундан ‘Вагнер’ билан қандай қилиб тўғри боғланишимни сўрадим. Отам менга бу борада ёрдам берди”, — деди у.
Унинг сўзларига кўра, хизмат пайтида “маълум бир ҳарбий жасорати учун” у “Жасорат учун” медалини олган.
21 апрель куни “Вагнер” асосчиси Евгений Пригожин Дмитрий Песковнинг ўғли хусусий ҳарбий кампания сафига қўшилганини ва артиллериячи сифатида Украинадаги уруш зонасига кетганини маълум қилган.
Унинг сўзларига кўра, президент матбуот котиби ўғлининг ҳамкасблари унинг отаси кимлигини билмаган. Николай “Вагнер”га бошқа исм ва фамилия билан “сохта ҳужжатлар” асосида қўшилган. Пригожин Николайни “Вагнер” сафига олишни Дмитрий Песков сўраганини айтган.
Ҳозирда Песковнинг ўғли таътилда, уруш зонасидан келганини Николайнинг ўзи тасдиқлаган.
Изоҳ (0)