Dushman harakatlarini kuzatadi: Eron armiyasiga 200 ta turli dronlar topshirildi (foto)

Eron armiyasi 200 ta har xil turdagi dronlar bilan kuchaytirildi. Bu haqda Akharin Khabar xabar berdi.

Aviatexnikalar orasida Eronda ishlab chiqarilgan ko‘p funksiyali, razvedka, shuningdek, zarba beruvchi dronlar bor. Eron mudofaa vaziri Amir Xotamiy armiyaga dronlarni topshirish marosimida ishtirok etdi.

U tadbirda so‘zga chiqib, razvedka platformasi sifatida xizmatga kirgan dronlar chegaralar yaqinida ehtimoliy dushmanning barcha harakatlarini kuzatib borishi, kerak bo‘lganda esa zarba berish uchun turli o‘q-dorilar bilan jihozlanishi mumkinligini aytdi.

Uning so‘zlariga ko‘ra, Karrar va Ababil kabi dronlar 14 km gacha balandlikka ko‘tarilish va 1500 km gacha bo‘lgan masofada jangovar vazifalarni bajarishga qodir.

AQSH Eron dronlarini ishlab chiqarish uchun elektron komponentlar sotib olishga yordam beradigan jismoniy va yuridik shaxslarga nisbatan sanksiyalarni davom ettirmoqda.

IRNA agentligining 19-aprel kuni xabar berishicha, olti kompaniya va bir kishi Eronga qurol va dron ishlab chiqarish uchun zarur bo‘lgan elektronika sotib olishga yordam bergani uchun AQSH sanksiyalari ostida qolgan.

18-aprel kuni Eron prezidenti Ibrohim Raisiy AQSH askarlarini Yaqin Sharqni tark etishga chaqirgandi. U xorijiy kuchlarning mavjudligi mintaqa xavfsizligiga tahdid solishi, ammo Eron Qurolli kuchlari qayerda bo‘lmasin, xavfsizlikni ta’minlashini ta’kidlagan.

Bundan tashqari, Ibrohim Raisiy Isroilning Eronga qarshi har qanday harbiy harakati Tel-Aviv va Hayfa shaharlarini “vayron qilish”ga olib kelishidan ogohlantirgandi.