MMA оламидаги энг нуфузли промоушен UFC’да 2023 йилда 8 та титул жанги ўтказилди. Қизиғи, уларнинг олтитасида янги чемпион аниқланди, фақат икки жангчи камарни муваффақиятли ҳимоя қила олди. “Дарё” 2023 йилда чемпионликка эришган ва титулни ҳимоя қилган UFC жангчиларини эслаб ўтади.
Брендон Морено
Мутлақ енгил вазн тоифаси вакили йилнинг дастлабки рақамли мусобақасида Дейвисон Фигейредога қарши тўртинчи жангини ўтказди. Жанг учинчи раунддан кейин тўхтатилди, шифокорлар бразилияликка жангни давом эттиришга рухсат бермади.
Морено ва Фигейредо ўртасидаги дастлабки жангда дуранг қайд этилган (титул Дейвисондан қолган). Кейинги жангда Брендон очколар эвазига ғалаба қозонган ва чемпионга айланган. Трилогияда Фигейредонинг қўли баланд келган. Морено азалий рақобатдаги тўртинчи жангда ютиб чиқди ва титулни қайтариб олди.
Жамал Ҳилл
Иржи Прохазканинг жароҳатидан кейин ярим оғир вазн тоифасининг камари вакант қолди. Аввалига ушбу камар учун Магомед Анкалаев ва Ян Блаҳович декабрь ойида кураш олиб борди. Бироқ уларнинг жангида ғолиб аниқланмади. Шу боис UFC навбатдаги даъвогарлар сифатида Жамал Ҳилл ва Гловер Тейшейрани танлади.
Риода ўтган MMA оқшомида Ҳилл мезбон спортчига имкон қолдирмади ва бир овоздан ғолиб деб топилди. Тейшейра мазкур жангдан кейин фаолиятини якунлашини маълум қилди.
Ислом Maxачев
Енгил вазн тоифаси чемпиони Австралияда ярим енгил дивизиони чемпиони ва ўша вақтда P4P рейтинги етакчиси Александр Волкановскига қарши октагонга кўтарилди.
Беш раунд давом этган жангнинг учта раундни Ислом ўз фойдасига ҳал қилди ва камарни муваффақиятли ҳимоя қилди.
Яир Родригес
Ярим енгил вазн тоифаси чемпиони бошқа дивизионга “саёҳат қилгани” кетгани боис ушбу дивизион вақтинчалик чемпионлиги учун жанг ўтказилди. Унда Яир Родригес ва Жош Эмметт ўзаро тўқнаш келди.
Австралияда ўтган жангнинг иккинчи раундида Родригес рақибини сабмишен эвазига таслим этди.
Алекса Грассо
UFC 285 мусобақасида йил апсети кузатилди. Промоушеннинг энг доминант чемпиони Валентина Шевченко осон ўтиши кутилган жангда мексикалик рақибига имкониятни бой берди.
Жангни тўлиқ ўз назоратида ушлаб турган қирғизистонлик спортчи тўртинчи раундда зарба бериш чоғида қўпол хатога йўл қўйди. Алекса Грассо эса бундан унумли фойдаланиб, сабмишен билан мағлуб этди.
Жон Жонс
Уч йиллик танаффусдан кейин тирик афсона UFC’га қайтди ва дарҳол янги ўзи учун янги ҳисобланган дивизионда чемпионликни қўлга киритди. Оғир вазн тоифасида Френсис Нганнудан кейин вакант қолган камар учун Жонс Сирил Ганга қарши жанг қилди.
Жонс беллашувни узоқ чўзиб ўтирмади ва биринчи раунддаёқ рақибини сабмишен билан таслим этди. Шу тариқа ярим оғир дивизионда узоқ вақт гегемонлик қилган Жон энг оғир вазн тоифасида ҳам чемпионга айланди. UFC ушбу камбекдан кейин Жонсни P4P рейтингида биринчи ўринга қайтарди.
Леон Эдвардс
Йилнинг яна бир сенсацион натижаларидан бири Леон Эдвардс ва Камару Усмон ўртасидаги трилогияда қайд этилди. Гарчи 2022 йилдаги ғалабага қарамасдан Эдвардс ушбу жангда аутсайдер сифатида қаралаётганди.
Бироқ Эдвардс беллашувга Камарудан кўра яхшироқ тайёрлангани маълум бўлди. Ярим йил аввалгидан фарқли ўлароқ Эдвардс UFC 286 оқшомидаги жангда анча ишончли ҳаракат қилди ва очколар эвазига ғалаба қозонди.
Исраэл Адесаня
Камарудан фарқли равишда Адесаня Алекс Перейрага қарши ўтган аввалги жанг тасодиф эканини исботлай олди. Ноябрь ойидаги ғалабадан кейин Перейра дарҳол реваншни қабул қилганди. Орадан беш ой вақт ўтиб жангчилар яна октагонга кўтарилди.
Жангни бразилиялик яккакурашчи ёмон бошламади ва тенгма-тенг кураш таклиф қила олишини билдириб қўйди. Бироқ иккинчи раундда Исраэл қарши ҳужумда моҳирона ҳаракат қилиб, рақибини чуқур нокаут ҳолатига тушириб қўйди ва камарини қайтариб олди.
Яқин орадаги титул жанглари ҳақида
Кейинги учта мусобақада MMA мухлисларини тўртта титул жанги кутиб турибди. Май ойида ўтадиган UFC 288 да ўта енгил дивизион чемпиони Алжамейн Стерлинг собиқ чемпион Генри Сехудога қарши жанг қилади. Июндаги UFC 289 турнирида Аманда Нуньес яна Жулиана Пеняга қаршилик қилади.
Июль ойидаги UFC 290 да иккита вазн тоифасида чемпионлик жанги ўтказилади. Ярим енгил тоифанинг чемпиони Александр Волкановски вақтинчалик чемпион Яир Родригес билан, мутлақ енгил вазн дивизиони чемпиони Брендон Морено эса Алехaндре Пантоя билан тўқнаш келади.
Изоҳ (0)