Andijon viloyati Bo‘ston tumanida xorijda ishlab chiqarilgan jami 711 million so‘mlik ayollar kiyimlari noqonuniy olib ketilayotganda to‘xtatib qolindi. Bu haqda viloyat ichki ishlar boshqarmasi axborot xizmati xabar berdi.
Taʼkidlanishicha, viloyati ichki ishlar boshqarmasi tezkor-qidiruv xizmati terrorizmga qarshi kurashish boshqarmasi hamda Bojxona boshqarmasining kontrabandaga qarshi kurashish bo‘limi xodimlari bilan hamkorlikda tezkor tadbir o‘tkazilgan.
Tadbir davomida Bo‘ston tumani hududida harakatlanib ketayotgan Isuzu rusumli avtotransport vositasi tekshirilganda, uning yukxonasida xorijda ishlab chiqarilgan bojxona rasmiylashtiruvidan o‘tganligini tasdiqlovchi hujjatlari mavjud bo‘lmagan umumiy narxi 710 million 920 ming so‘m bo‘lgan 49 turdagi 3 ming 534 dona ayollar kiyimlari borligi aniqlanib, tegishli tartibda hujjatlashtirib olindi.
Hozirda mazkur holat yuzasidan viloyat Bojxona boshqarmasi tomonidan dastlabki surishtiruv harakatlari olib borilmoqda.
Izoh (0)