Samarqand viloyatida ishqiy munosabatda bo‘lib kelgan erkakdan pul undirmoqchi bo‘lgan ayol qo‘lga olindi, deb xabar beradi IIV matbuot xizmati.
Qayd etilishicha, 31 yoshli ayol 33 yoshli pastdarg‘omlik erkakdan tovlamachilik yo‘li bilan pul talab qilgan. Erkak 2022-yil fevral oyida ayolning yashash xonadoniga dori olib borib bergan vaqtida tanishib qolgan. U bilan yaqin aloqada bo‘lib kelgan va 2022-yil avgust oylarida munosabatlar uzilib, uchrashuvlar to‘xtagan. O‘tgan yilning dekabr oyida ayol erkakka tez-tez qo‘ng‘iroq qilib, u bilan birga bo‘lgan vaqtlaridagi rasmlar va videolari borligini aytib, ushbu video va rasmlarni, qolaversa, u bilan bo‘lgan yozishmalarni oilasiga ko‘rsatishi bilan qo‘rqitgan.
2023-yil mart oyida aytilgan pullarni bermasa hammasini uning oilasiga ko‘rsatib, oilasini buzish bilan bir necha bor tahdid qilgan va evaziga 15 ming dollar miqdorida pul talab qilgan.
Mazkur holat yuzasidan 11-aprel kuni Samarqand viloyat IIB TQX JQB xodimlari tomonidan Samarqand shahar Ali Qushchi ko‘chasida o‘tkazilgan tezkor tadbir davomida gumonlanuvchi ariza muallifidan 6 ming dollar miqdoridagi pullarni olayotgan vaqtda daliliy ashyolar bilan qo‘lga olingan.
Holat yuzasidan Jinoyat kodeksining tegishli moddalariga asosan jinoyat ishi qo‘zg‘atilib, hozirda tergov harakatlari olib borilmoqda.
O‘zbekistonda o‘zganing yalang‘och foto yoki videolarini tarqatish bilan qo‘rqitganlik uchun javobgarlik qanday?
Prezident tomonidan 11-aprel kuni “Xotin-qizlar va bolalar huquqlari, erkinliklari hamda qonuniy manfaatlarini ishonchli himoya qilish tizimi yanada takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonun qabul qilingan.
Qonun bilan intim hayot daxlsizligini buzganlik uchun jinoiy javobgarlik belgilangan, ya’ni Jinoyat kodeksi quyidagi mazmundagi 141-3-modda bilan to‘ldirilgan:
“Shaxsning roziligisiz uning tanasining va (yoki) jinsiy a’zolarining yalang‘och holdagi foto yoki videotasvirini o‘z ichiga olgan ma’lumotlarni tarqatish, shu jumladan ommaviy axborot vositalarida, telekommunikatsiya tarmoqlarida yoki internet jahon axborot tarmog‘ida tarqatish yoki bunday ma’lumotlarni tarqatish bilan qo‘rqitish — bazaviy hisoblash miqdorining 400 baravaridan 600 baravarigacha (120 million so‘mdan 180 million so‘mgacha) miqdorda jarima yoki 360 soatgacha majburiy jamoat ishlari yoxud uch yilgacha axloq tuzatish ishlari bilan jazolanadi.
O‘sha harakatlar:
a) takroran yoki xavfli retsidivist tomonidan;
b) bir guruh shaxslar tomonidan oldindan til biriktirib;
v) voyaga yetmagan shaxsga nisbatan sodir etilgan bo‘lsa
360 soatdan 480 soatgacha majburiy jamoat ishlari yoki bir yildan uch yilgacha ozodlikni cheklash yoxud uch yilgacha ozodlikdan mahrum qilish bilan jazolanadi”.
Izoh (0)