Samsung qurilmalarida endi Microsoft’ning Bing qidiruv tizimi Google o‘rnini bosishi mumkin. Bu haqda Google'ning ichki yozishmalariga asoslanib, Forbes xabar bermoqda.
Ma’lumotlarga ko‘ra, Samsung har yili Google’ga 3 milliard dollar daromad keltiruvchi shartnomani uzaytirmasligi mumkinligi haqidagi xabar kompaniyada “vahima” keltirib chiqargan.
Rahbariyat ko‘ngillilardan Samsung kompaniyasini so‘nggi 12 yil davomida amalda bo‘lgan shartnomani yangilashga ishontirish uchun taqdimotga materiallar to‘plashni so‘ragach, xodimlar hayratda qoldi, — deb yozadi NYT.
Google xodimlarining fikricha, Janubiy Koreya kompaniyasi uchun hal qiluvchi omil ChatGPT chat-botining neyron tarmoq yordamida foydalanuvchi so‘rovlariga javob bera oladigan Bing qidiruv tizimiga integratsiyalashgani bo‘ldi.
Mavqeni yo‘qotmaslik uchun Google bir vaqtning o‘zida qidiruv tizimini yangilash bo‘yicha bir nechta loyihalarni, jumladan, sun’iy intellektni kompaniyaning mavjud mahsulotlariga integratsiyalash bo‘yicha Magi loyihasini ishga tushirdi, — deyiladi xabarda.
Google matbuot kotibi Lara Levin kompaniya “qidiruv uchun sun’iy intellektga asoslangan yangi xususiyatlarni joriy etishga” tayyorlanayotganini tasdiqladi.
7-fevral kuni Microsoft yangilangan Bing qidiruv tizimini e’lon qildi. Unda ChatGPT texnologiyalari muhim rol o‘ynaydi. Ilgari IT giganti chatbotni ishlab chiqqan OpenAIga 10 milliard dollar sarmoya kiritgan.
Ko‘p o‘tmay, Google taqdimot o‘tkazdi. Unda kompaniya ChatGPT raqobatchisi Bard haqida batafsil ma’lumot berishi kerak edi. Biroq u qadar yangi ma’lumot taqdim eta olmadi va The Verge ta’kidlaganidek, Microsoft'ning “muvaffaqiyatini takrorlay olmadi”.
Izoh (0)