Samsung қурилмаларида энди Microsoft’нинг Bing қидирув тизими Google ўрнини босиши мумкин. Бу ҳақда Google’нинг ички ёзишмаларига асосланиб, Forbes хабар бермоқда.
Маълумотларга кўра, Samsung ҳар йили Google’га 3 миллиард доллар даромад келтирувчи шартномани узайтирмаслиги мумкинлиги ҳақидаги хабар компанияда “ваҳима” келтириб чиқарган.
Раҳбарият кўнгиллилардан Samsung компаниясини сўнгги 12 йил давомида амалда бўлган шартномани янгилашга ишонтириш учун тақдимотга материаллар тўплашни сўрагач, ходимлар ҳайратда қолди, — деб ёзади NYT.
Google ходимларининг фикрича, Жанубий Корея компанияси учун ҳал қилувчи омил ChatGPT чат-ботининг нейрон тармоқ ёрдамида фойдаланувчи сўровларига жавоб бера оладиган Бинг қидирув тизимига интеграциялашгани бўлди.
Мавқени йўқотмаслик учун Google бир вақтнинг ўзида қидирув тизимини янгилаш бўйича бир нечта лойиҳаларни, жумладан, сунъий интеллектни компаниянинг мавжуд маҳсулотларига интеграциялаш бўйича Маги лойиҳасини ишга туширди, — дейилади хабарда.
Google матбуот котиби Лара Левин компания “қидирув учун сунъий интеллектга асосланган янги хусусиятларни жорий этишга” тайёрланаётганини тасдиқлади.
7 февраль куни Microsoft янгиланган Бинг қидирув тизимини эълон қилди. Унда ChatGPT технологиялари муҳим рол ўйнайди. Илгари IT гиганти чатботни ишлаб чиққан OpenAI’га 10 миллиард доллар сармоя киритган.
Кўп ўтмай, Google тақдимот ўтказди. Унда компания ChatGPT рақобатчиси Bard ҳақида батафсил маълумот бериши керак эди. Бироқ у қадар янги маълумот тақдим эта олмади ва The Verge таъкидлаганидек, Microsoft’нинг “муваффақиятини такрорлай олмади”.
Изоҳ (0)