O‘zbekistonda jazoni ijro etish muassasalaridan ozod qilingan shaxslarga bir martalik nafaqa tayinlash va to‘lash tartibi to‘g‘risidagi nizom tasdiqlandi.
Vazirlar Mahkamasining tegishli qarori bilan tasdiqlagan nizomga ko‘ra, nafaqa tayinlash uchun murojaat qilish, murojaatlarni ko‘rib chiqish va nafaqa tayinlash “E-probatsiya” axborot tizimi orqali amalga oshiriladi.
Nafaqa tuman (shahar) probatsiya bo‘linmalari tomonidan tayinlanadi hamda mahalliy byudjetdan ajratiladigan mablag‘lar hisobidan to‘lanadi. Tayinlangan nafaqa “E-probatsiya” axborot tizimi orqali taqdim etilgan ma’lumotlar asosida to‘lanadi.
Prezident huzuridagi Ijtimoiy himoya milliy agentligi tomonidan har oyning 2-sanasiga qadar o‘tgan oyda to‘langan nafaqalarning umumiy summasidan kam bo‘lmagan miqdordagi mablag‘lar to‘g‘ridan-to‘g‘ri shartnoma tuzilgan tijorat banki yoki boshqa ixtisoslashgan tashkilot hisobvarag‘iga o‘tkazib beriladi.
Jazoni ijro etish muassasalaridan ozod qilingan shaxslarning murojaatiga asosan “Yagona reyestr” AT orqali elektron yuborilgan to‘lov qaydnomalariga muvofiq nafaqa tijorat banki tomonidan naqd pul shaklida to‘lanadi yoki ularda mavjud bank kartalariga o‘tkazib beriladi.
2025-yil 1-sentyabrga qadar “E-probatsiya” axborot tizimi “Yagona reyestr” ATga integratsiya qilinadi hamda “E-probatsiya” axborot tizimi orqali nafaqa tayinlash bo‘yicha murojaatlarni qabul qilish, ko‘rib chiqish va tayinlashning barcha texnik imkoniyatlari yaratiladi.
Nafaqa O‘zbekistondagi jazoni ijro etish muassasalaridan ozod qilingan O‘zbekiston fuqarolari, O‘zbekistonda doimiy yashaydigan chet el fuqarolari va fuqaroligi bo‘lmagan shaxslarga tayinlanadi.
Nafaqa miqdori qancha?
“Aholini ijtimoiy himoya qilish tizimini moliyalashtirish tartib-taomillarini takomillashtirish to‘g‘risida”gi prezident farmoniga ko‘ra, 2025-yil 1-maydan boshlab ozodlikdan mahrum etish joylaridan ozod qilingan shaxslarga BHMning 6 baravari miqdoridagi bir martalik nafaqa pulini uni tayinlashning amaldagi tartibi saqlab qolingan holda “Inson” ijtimoiy xizmatlar markazlari orqali to‘lash belgilangan. Bazaviy hisoblash miqdori 1-avgustdan 412 000 so‘m bo‘lishini hisobga olsa ozodlikdan mahrum etish joylaridan ozod qilingan shaxslarga beriladigan bir martalik nafaqa puli shu sanadan boshlab 2 million 472 ming so‘mga teng bo‘ladi.
Izoh (0)