Sirdaryo viloyatida obodonlashtirish brigadasi boshlig‘i qo‘l ostida ishlaydigan ko‘cha supuruvchi ayol nomiga kredit olib hajga bordi. Bu haqda Sirdaryo viloyati hokimi Erkinjon Turdimov ma'lum qildi.
Viloyat rahbarining aytishicha, obodonlashtirish xodimlari 10 kunga “Jasorat maktabi”ga olib borilgan. U yerda Turdimov bilan bo‘lgan suhbatda avvaliga hech kim muammosini ochiq aytmagan. Ammo keyinchalik xodimlardan biri onasi o‘zini osmoqchi bo‘layotganini maʼlum qilgan.
Sababini so‘rasam, aytib berdi: brigada boshlig‘i onasidan kredit olishni so‘ragan. Kreditni esa o‘z vaqtida to‘lamagan. Kechikkan qarz ortib ketgan. O‘sha pulni olgan odam esa xotini bilan hajga ketgan. Kreditni esa bu ayol to‘layapti, dedi Erkinjon Turdimov.
Viloyat hokimning qo‘shimcha qilishicha, jabrlanuvchi ayol va “hoji bobo”ni chaqirgan, biroq brigada boshlig‘i kelmagan.
Ertaga bilib, o‘zi xijolat bo‘lib, pullarni to‘lab, hisob-kitob qilib kelibdi. Mayli, shunga ham shukr dedik. Qarang, odamlarimizning qanday bag‘rikengligi bor!, dedi hokim.
Sirdaryo viloyati hokimligi matbuot xizmatining “Daryo”ga maʼlum qilishicha, holatni viloyat Adliya boshqarmasi o‘rganishni boshlagan va shu vaqt oralig‘ida brigada boshlig‘i kreditdan qarzdorlikni to‘lab bergan.
Izoh (0)