Jonli konsert dasturida kuylash vaqtida har qanday san’atkor ham xatolikka yo‘l qo‘yadi. Mikrofon ishlamay qolishi, libosning yirtilib ketishi yoki zinadan sirg‘anib tushish kabi holatlar minglab tomoshabinlar va millionlab onlayn kuzatuvchilar ko‘z o‘ngida yuz berib turadi. Haqiqiy san’atkor aynan shunday paytlarda o‘zining professional ekanligini namoyon etib, eng noqulay vaziyatlardan chiqib keta oladi.
Ledi Gaga — mikrofon ishlamay qolgan
Coachella—2025 festivalida xonanda Ledi Gaga yangi “Abracadabra” qo‘shig‘ini ilk bor jonli ijro etayotgan edi. Biroq mikrofon to‘satdan ishlamay qoldi: ovoz uzildi, turli shovqinlar paydo bo‘ldi, ammo musiqa esa davom etdi. Gaga esa bir soniyada zaxira mikrofonni olib, kuylashni davom ettirdi va ijroni hech qanday pauzasiz tugatdi.
Keyingi qo‘shiqqa o‘tishdan avval u pianino qarshisiga o‘tirib, nim tabassum bilan tomoshabinlarga shunday dedi:
“Mana endi sizlarga jonli ijroda qo‘shiq aytaman!”
Zal uni olqish bilan qarshi oldi.
Janet Jekson — Super Bowl konsertidagi kutilmagan holat
2004-yil 1-fevral, Super Bowl final konsertida Janet Jekson va Jastin Timberleyk duet ijro etayotgan edi. Ammo sahna harakati chog‘ida Jastin Janetning libosini bilmay tortib yubordi, natijada xonandaning kiyimi biroz yirtilib ketdi. Janet darrov tashqi ko‘rinishini tartibga keltirib oldi. Bularning bari bor-yo‘g‘i bir necha soniya davom etdi, ammo AQSH ommaviy axborot vositalari uni “asr mojarosi”ga aylantirdi.
Janet chiqishni tugatgach, muxlislaridan kechirim so‘rab, bu tasodifiy hodisa ekanini aytdi. Afsuski, OAV va reklama beruvchilar uni keskin tanqid qildi, radiolar esa uning qo‘shiqlarini efirdan olib tashladi.
Adel — qo‘shiq so‘zlarini unutib qo‘ygan
2016-yilda Lissabondagi konsertda xonanda Adel “Million Years Ago”ni ijro etayotgan paytda so‘zlarni unutib qo‘ydi. U xatoni yashirishga urinish o‘rniga, o‘zi kulib: “Men ikkinchi kuplet o‘rniga yana birinchisini aytdim. Kechirasiz!” deb tomoshabinlarga murojaat qildi.
Uning samimiyligi va hazilkashligi zaldagi muxlislar tomonidan olqish bilan kutib olindi. Oradan ko‘p o‘tmay, ijtimoiy tarmoqlarda uning videolari tarqaldi. Adel keyinchalik:
“Men ham oddiy insonman, robot emasman. Muxlislar buni yaxshi tushunadi,” degan edi.
Beyonse — zinadan sirg‘anib tushsa ham qo‘shiq aytishda davom etgan
2007-yil yozida Orlando shahridagi konsertda Beyonse “Ring the Alarm”ni ijro etayotgan paytda zinadan yiqildi. Ko‘pchilik san’atkorlar bu kabi vaziyatdan so‘ng o‘zini yo‘qotib qo‘ygan bo‘lardi, ammo Beyonse darhol o‘rnidan turdi va qo‘shiqni to‘xtamasdan davom ettirdi.
Konsertdan keyin hazil bilan: “Iltimos, bu videoni YouTube’ga joylamang”, deya iltimos qildi, biroq video allaqachon tarqalib bo‘lgan edi.
Dua Lipa — mikrofoni qo‘lidan uchib ketgan
2022-yil Vashingtondagi konsertda Dua Lipa “New Rules”ni kuylayotgan paytda, mikrofon qo‘lidan sirg‘anib ketib, to‘g‘ri muxlislar tomon uchib tushdi. Biroq xonanda sahnada jim turib qolmadi va harakatda davom etdi.
Tomoshabinlar esa xonanda o‘rniga kuylab turdi, texnik xodim esa unga zudlik bilan yangi mikrofon olib chiqdi.
Izoh (0)