11 апрель куни кечқурун ижтимоий тармоқларда, тахминларга кўра, россиялик ҳарбийлар украиналик аскарни шафқатсизларча ўлдиргани тасвирланган видео тарқалди.
The Insider нашрининг ёзишича, дастлабки видеолардан бири Россияда экстримистик деб тан олинган ёпиқ Telegram каналида пайдо бўлган. Сўнг видео Россиянинг Украинага босқинини қўллаб-қувватловчи Telegram каналлар ва Украина ижтимоий тармоқларида ҳам тарқалди.
Видео қаҳрамонларининг шахси, видео қачон, қаерда ва ким томонидан ёзиб олингани аниқ эмас. Видеодаги яшил ўт-ўланлар унинг 2022 йил ёзида суратга олинганидан далолат беради. Видеонинг ҳақиқийлиги тасдиқланмаган.
Видеода номаълум ҳарбий қўлига украиналик аскарларга хос сариқ тасма боғланган эркакнинг бошини тириклайин кесиб олади. Қотилнинг кийимида унинг қайси томонга тегишли эканини билдирувчи бирор белги кўринмаган. Кадр ортида бир киши: “Уни қопга солиб, командирга юборинглар”, дейди.
Шунингдек кадр ортида ҳарбийларнинг рациядан гапираётгани эшитилади.
Видео тармоқда пайдо бўлганидан кўп ўтмай, Украина президенти офисининг раҳбари Андрей Ермак ўзининг Telegram каналида қуйидагича пост қолдирди: “Ҳамма нарсанинг жавоби, жавобгарлиги бўлади”. Унинг изоҳи нима ҳақида экани айтилмаган. Украина матбуоти фикрича, Ермак қотиллик ҳақидаги видеога шундай муносабат билдирган.
Украина ва Россиянинг бошқа расмийлари ҳозирча видеога изоҳ беришмади. Украина Хавфсизлик хизмати видео юзасидан тергов бошлагани хабар қилинди.
Март ойи бошида ижтимоий тармоқларда украиналик ҳарбий асирнинг рус аскарлари томонидан отиб ўлдирилиши тасвирланган видео тарқалганди. Унда қуролсиз украиналик аскар “Украинага шон-шараф” дейди. Шундан кейин қатор ўқ овозлари эшитилади ва у йиқилади. Тасвир қаерда, қачон ва ким томонидан ёзиб олингани номаълум. Украина Қуролли кучлари ҳалок бўлган аскарнинг шахсини тасдиқлади: у Чернигов ҳудудий мудофааси жангчиси Александр Матсиэвский эди.
Изоҳ (0)