Ўзбекистон Малайзия компанияси билан автомобилсозлик соҳасида ҳамкорлик қилади

Малайзия компанияси билан автомобилсозлик соҳасида қўшма лойиҳани амалга ошириш бўйича келишувга эришилди. 

Хабарга кўра, Ўзбекистон элчихонаси ходимлари Малайзиянинг Amtel Holdings Bhd компанияси ижрочи директори Лим Хун Тейк билан музокаралар ўтказди. Учрашув аввалида Малайзия томони компания ишлаб чиқарадиган автомобиль камералари, навигация тизимлари ва электромобилларни қувватлаш станциялари тўғрисида тақдимот ўтказди.

Малайзия томонига Ўзбекистонда олиб борилаётган иқтисодий ислоҳотлар, шу жумладан “Ўзавтосаноат” АЖ ва унинг таркибидаги корхоналар, ишлаб чиқариладиган автомобиллар турлари ва ҳажмлари, мамлакатда электромобилларни ишлаб чиқариш имкониятлари ва автомобилсозлик соҳасида инвесторлар учун яратилган имкониятлар тўғрисида батафсил маълумот берилди.

Қайд этилишича, тадбир давомида хориж томони билан мамлакатда автомобилсозлик соҳасида эҳтиёт қисмлар ва автомобиль аксессуарларини ишлаб чиқариш бўйича қўшма лойиҳаларни амалга ошириш масалалари ва электромобилларни қувватлаш станциялари тармоқларини қуриш имкониятлари муҳокама қилинди.

Музокаралар натижасида Amtel Holdings Bhd компанияси вакилларининг 27—28 апрель кунлари бўлиб ўтадиган II Тошкент халқаро инвестиция форумига иштирок этиш мақсадида мамлакатга амалий сафарини ташкил этиш тўғрисида келишувга эришилди. Сафар давомида Малайзия томони “Ўзавтосаноат” АЖ ва унинг таркибидаги корхоналар раҳбарияти билан автомобилсозлик соҳасида қўшма инвестиция лойиҳаларини амалга ошириш имкониятларини ўрганиш ва ҳамкорлик истиқболларини муҳокама қилиш учун учрашувлар ўтказиши режалаштирилган.

Маълумот берилишича, Amtel Holdings Bhd компанияси 1993 йилда ташкил этилган. Корхонанинг асосий фаолият тури GPS навигация тизимлари учун дастурий таъминотлар ишлаб чиқариш ва уларни йиғишдан иборат. Шуниндек, ушбу компания Малайзияда электромобиллар учун қувватлаш станцияларини қуриш бўйича катта тажрибага эга.