Oʻzbekiston va Sloveniya avtomobilsozlik sohasida hamkorlik qilishi kutilmoqda
Oʻzbekiston avtomobilsozlik, butlovchi qismlar, metall buyumlar, gidravlik turbinalar, nasoslar, farmatsevtika mahsulotlari birgalikda ishlab chiqarishda Sloveniya bilan sheriklik munosabatlarini oʻrnatadi. Bu haqda Investitsiyalar, sanoat va savdo vazirligi axborot xizmati xabar berdi.
Xabarga koʻra, 8-fevral kuni Toshkentda “Oʻzbekiston – Sloveniya” biznes-forumi boʻlib oʻtdi. Unda tegishli vazirlik, idoralar, tarmoq birlashmalari rahbarlari va ikki mamlakat ishbilarmon doiralarining 100 dan ortiq vakillari ishtirok etdi. Forumda Oʻzbekiston delegatsiyasiga Oʻzbekiston Respublikasi Bosh vazirining oʻrinbosari Jamshid Xodjayev, Sloveniya delegatsiyasiga esa Sloveniya Respublikasi Bosh vazirining oʻrinbosari — tashqi ishlar vaziri Tani Fayon boshchilik qildi.
Qayd etilishicha, tashqi savdodagi koʻrsatkichlarni oshirish uchun tomonlar ikki mamlakat ishbilarmon doiralari uchun zarur qoʻshimcha shart-sharoitlarni yaratib berish masalalari boʻyicha kelishib oldi. Erishilgan kelishuvlar biznes-forum davomida imzolangan Oʻzbekiston va Sloveniya oʻrtasida Iqtisodiy hamkorlik toʻgʻrisidagi bitimda aksini topdi.
Shuningdek, taqdimot va ishbilarmon doiralari vakillari oʻrtasida kechgan muloqotlarda avtomobilsozlik, butlovchi qismlar, metall buyumlar, gidravlik turbinalar, nasoslar, farmatsevtika mahsulotlari birgalikda ishlab chiqarishda sheriklik munosabatlarini oʻrnatish istiqbollari koʻrib chiqilgan. Chorvachilik, bogʻdorchilik va urugʻchilikni rivojlantirish boʻyicha qoʻshma loyihalarni amalga oshirish uchun agrosanoat kompleksini yaratish, shuningdek, Sloveniyaning Mercator Group yirik savdo tarmogʻi filialining Oʻzbekistonda faoliyatini tashkil etish imkoniyatlari muhokama qilingan.
Taʼkidlanishicha, tadbir yakunida ishtirokchilar Oʻzbekiston va Sloveniya oʻrtasidagi iqtisodiy hamkorlikni yanada kengaytirish, mustahkam ishbilarmonlik aloqalarini oʻrnatish, qoʻshma loyiha va tashabbuslarni amalga oshirishda tadbirkorlarni har tomonlama qoʻllab-quvvatlashga tayyorligini bildirdi. Forum “B2B” va “G2B” muzokaralari sessiyasi bilan davom etdi, unda tomonlar yangi investitsiyaviy loyihalarni ishlab chiqish hamda mamlakatlar oʻrtasidagi amaliy hamkorlikni yangi darajaga chiqarish va rivojlantirishga qaratilgan mustahkam savdo aloqalarini oʻrnatish yuzasidan fikr va takliflar almashdi.
