Хабарингиз бор, кеча, 7 апрель куни Open budget’га овоз йиғиш якунланиб, жорий йил биринчи мавсум ғолиблари эълон қилинди. Энг кўп овоз тўплаган маҳаллалар вакиллари байрам қилишни бошлаб юборди. Ғолиб маҳаллаларда карнай-сурнай садолари янграмоқда.
Маълум бўлишича, биринчи мавсумда ғолиб деб топилган ташаббуслар 1666 та бўлиб, бу ишлар учун 1,6 триллион сўм маблағ ажратилган.
Қашқадарё вилоятининг Деҳқонобод туманидаги “Оқработ” маҳалла фуқаролар йиғинида жойлашган 7-сонли умумтаълим мактабининг асосий биносидан Шамоликам қишлоғидаги мактаб филиалига бориш учун 3,5 километр йўл босилади. Мазкур йўл аҳволи ачинарли бўлгани боис, маҳаллий аҳоли ушбу йўлни асфалтлаш учун 1 миллиард 200 миллион сўм миқдорда маблағ сўраб, йўл таъмирини таклиф қилган. Тасдиқланган маблағ 900 миллион сўмни ташкил қилмоқда. “Ташаббусли бюджет”да фаол бўлган маҳалла мазкур лойиҳасини амалга ошириш учун етарли овоз тўплади ва 900 миллион сўм миқдоридаги маблағни қўлга киритди. Маҳалла аҳолиси байрамни бошлаб юборган.
Шунингдек, Яккабоғ туманидаги “Дархон” МФЙ Бутасой қишлоғи, Янгиобод қишлоғи аҳолиси 25 мингга яқин овоз тўплаб, керакли маблағни қўлга киритди.
“Ташаббусли бюджет”да овоз берган фуқаролар Ўзбекистондаги мавжуд аҳолининг 45 фоизини ташкил қилмоқда. Маълум бўлишича, жорий мавсумда 16 миллиондан ортиқ овозлар берилган. 7,7 миллиондан ортиқ овозлар лойиҳаларнинг ғолиб бўлишига сабаб бўлган. Овоз бериш жараёнларида эса жами 8826 та маҳалла иштирок этган.
Мисол учун, Сурхондарё вилоятида — 719 та (жами маҳалла сонига нисбатан 99 фоиз), Қашқадарё вилоятида — 813 та (99 фоиз) ва Наманган вилоятида — 779 та (98 фоиз) маҳаллалар овоз бериш жараёнларида иштирок этди.
Изоҳ (1)
Опен бюджет шарманда