“Toshkent yo‘lovchi vagonlarni qurish va ta‘mirlash zavodi” AJ tomonidan ishlab chiqarilgan 8 dona 61-942 rusumidagi maxsus kontingentlarni tashish uchun mo‘ljallangan yangi maxsus vagonlar Qozog‘istonga yetkazib berildi. Bu haqda “O‘zbekiston temir yo‘llari” ma’lum qildi.
Qayd etilishicha, ushbu vagonlar MDH davlatlari temiryo‘llarida foydalanish uchun mo‘ljallangan. Vagonlar TR TS 001/2011 texnik reglamentining barcha talablariga to‘liq javob beradi hamda muvofiqlik sertifikatiga ega.
Qozog‘iston Milliy gvardiyasining texnik shartlariga asosan “Toshkent yo‘lovchi vagonlarni qurish va ta‘mirlash zavodi” AJ rahbariyati boshchiligida hamda yetakchi mutaxassislarning normativ hujjatlariga asoslangan loyihalari bo‘yicha ishlab chiqarilgan maxsus vagonlar Ostona shahriga yetkazib berilgan va buyurtmachiga topshirilgan.
“Mazkur vagonlar dizayni o‘ziga xos bo‘lib, qo‘shimcha zamonaviy jihozlarni o‘z ichiga oladi. Xususan, havoni mo‘tadillashtirish tizimi, ichimlik suvi va havoni dezinfeksiyalash uskunasi, ekologik toza biohojatxona, video kuzatuv moslamasi, eshiklar holati to‘g‘risida signal beruvchi qurilma va boshqalar”, — deyiladi xabarda.
Ta’kidlanishicha, bugungi kunda ikki davlatning o‘zaro hamkorlik aloqalarini yanada rivojlantirish maqsadida yangi maxsus vagonlarini ishlab chiqarish loyihalari ham ko‘rib chiqilmoqda.
Senatning o‘ttiz to‘qqizinchi yalpi majlisida “O‘zbekiston Respublikasi bilan Qozog‘iston Respublikasi o‘rtasida ozodlikdan mahrum etilgan shaxslarni jazoni o‘tashni davom ettirish uchun topshirish to‘g‘risidagi shartnomani ratifikatsiya qilish haqida”gi qonun ko‘rib chiqilgandi. Ushbu shartnoma bilan O‘zbekiston va Qozog‘iston fuqarolarining sud tomonidan tayinlangan jazoni o‘z mamlakatida o‘tash imkonini beradi.
Hujjatga ko‘ra, mahkumlar qonunda belgilangan tartib-taomillarga muvofiq kelishayotgan tomonlar murojaatlari asosida topshiriladi. Mahkumlar jazoni o‘z yurtida o‘tashi ularga yaqin qarindoshlari bilan muntazam ko‘rishish imkonini berishi oilaviy munosabatlarga ijobiy ta’sir ko‘rsatib, mahkumlarning ijtimoiy hayotga moslashishiga yordam beradi.
Izoh (0)