Toshkentdagi Ixtisoslashtirilgan yuqumli kasalliklar shifoxonasi vaqtinchalik Zangiota tumaniga ko‘chirilgani va bu xodimlarga noqulaylik tug‘dirayotgani to‘g‘risida xabar berilgandi. “Toshshahartransxizmat”ning ma’lum qilishicha, 7-apreldan Zangiota yuqumlik kasalliklar shifoxonasigacha qatnovchi avtobus yo‘nalishi tashkil etilgan.
Qayd etilishicha, 7-aprel kunidan boshlab, 154-sonli Zangiota yuqumli kasalliklar shifoxonasi—Olchazor mahallasi yangi avtobus yo‘nalishi harakati tashkil etilmoqda.
Yo‘nalish harakati “Zangiota yuqumli kasalliklar shifoxonasi” bekatidan 4P21 3-halqa yo‘li, Qipchoq, M.Tursunzoda, Shokirariq ko‘chalari orqali “Olchazor” mahallasiga qadar, ish tartibi soat 06:00 dan 21:30 gacha etib belgilangan.
Mazkur yo‘nalishda xizmat ko‘rsatish huquqi jamiyatning “4-Avtobus saroyi” filialiga biriktirilib, yo‘nalishda kichik sig‘imli Isuzu rusumli avtobuslar harakatlanishi belgilangan.
Avvalroq Toshkentda yana 20 ta katta sig‘imli MAN avtobuslari yo‘lovchilarni tashishni boshlashi, Toshkentda to‘rtta avtobus yo‘nalishiga o‘zgartirish kiritilgani, jamoat transportida moslashuvchan tarif rejalari apreldan joriy etilishi to‘g‘risida xabar berilgandi.
Izoh (0)