Senatning 39-yalpi majlisida maʼmuriy jarimalarni to‘lashda aholiga qo‘shimcha qulayliklar yaratishga oid qonun muhokama qilindi.
Qonun bilan “Maʼmuriy javobgarlik to‘g‘risida”gi kodeksning 332 prim 1 moddasi, yaʼni jarima solish to‘g‘risidagi qarorni ijro etishning soddalashtirilgan tartibi yangi tahrirda bayon etilmoqda.
2023-yil 1-maydan boshlab, huquqbuzar jarima solingan vaqtdan eʼtiboran 15 kun ichida jarimaning 50 foizini, 30 kun ichida 70 foizini ixtiyoriy ravishda to‘lasa, u jarimaning qolgan qismini to‘lashdan ozod qilinishi belgilanmoqda.
Agar huquqbuzar bir oylik muddatni o‘tkazib yuborsa, jarimaning to‘liq midorini to‘lashi shart bo‘ladi.
Mazkur tartib sud qarorlariga nisbatan qo‘llaniladigan jarimalar uchun ham tatbiq etiladi.
Qonunga binoan, ikkita istisno holatda huquqbuzar haydovchi jarimani chegirmasiz to‘lashiga to‘g‘ri keladi. Yaʼni transport vositalarini mast holda boshqarganlik uchun, haydovchi va yo‘l harakatining boshqa ishtirokchisining mastligi yoki mast emasligini aniqlashda tekshiruvdan o‘tishdan bo‘yin tovlagan taqdirda jarima yengillashtirilmaydi.
Izoh (0)