“Тошкент йўловчи вагонларни қуриш ва таъмирлаш заводи” АЖ томонидан ишлаб чиқарилган 8 дона 61-942 русумидаги махсус контингентларни ташиш учун мўлжалланган янги махсус вагонлар Қозоғистонга етказиб берилди. Бу ҳақда “Ўзбекистон темир йўллари” маълум қилди.
Қайд этилишича, ушбу вагонлар МДҲ давлатлари темирйўлларида фойдаланиш учун мўлжалланган. Вагонлар ТР ТС 001/2011 техник регламентининг барча талабларига тўлиқ жавоб беради ҳамда мувофиқлик сертификатига эга.
Қозоғистон Миллий гвардиясининг техник шартларига асосан “Тошкент йўловчи вагонларни қуриш ва таъмирлаш заводи” АЖ раҳбарияти бошчилигида ҳамда етакчи мутахассисларнинг норматив ҳужжатларига асосланган лойиҳалари бўйича ишлаб чиқарилган махсус вагонлар Остона шаҳрига етказиб берилган ва буюртмачига топширилган.
“Мазкур вагонлар дизайни ўзига хос бўлиб, қўшимча замонавий жиҳозларни ўз ичига олади. Хусусан, ҳавони мўтадиллаштириш тизими, ичимлик суви ва ҳавони дезинфекциялаш ускунаси, экологик тоза биоҳожатхона, видео кузатув мосламаси, эшиклар ҳолати тўғрисида сигнал берувчи қурилма ва бошқалар”, — дейилади хабарда.
Таъкидланишича, бугунги кунда икки давлатнинг ўзаро ҳамкорлик алоқаларини янада ривожлантириш мақсадида янги махсус вагонларини ишлаб чиқариш лойиҳалари ҳам кўриб чиқилмоқда.
Сенатнинг ўттиз тўққизинчи ялпи мажлисида “Ўзбекистон Республикаси билан Қозоғистон Республикаси ўртасида озодликдан маҳрум этилган шахсларни жазони ўташни давом эттириш учун топшириш тўғрисидаги шартномани ратификация қилиш ҳақида”ги қонун кўриб чиқилганди. Ушбу шартнома билан Ўзбекистон ва Қозоғистон фуқароларининг суд томонидан тайинланган жазони ўз мамлакатида ўташ имконини беради.
Ҳужжатга кўра, маҳкумлар қонунда белгиланган тартиб-таомилларга мувофиқ келишаётган томонлар мурожаатлари асосида топширилади. Маҳкумлар жазони ўз юртида ўташи уларга яқин қариндошлари билан мунтазам кўришиш имконини бериши оилавий муносабатларга ижобий таъсир кўрсатиб, маҳкумларнинг ижтимоий ҳаётга мослашишига ёрдам беради.
Изоҳ (0)