Фарғонада вилоят перинатал марказининг 19 млрд сўм эвазига бунёд этилган янги биноси фойдаланишга топширилди (фото)

Фарғона вилояти перинатал марказининг 4 қаватли замонавий неонатал блоги биноси фойдаланишга топширилди. Бу ҳақда “Дарё” мухбири Азизжон Эрматов хабар берди.

Шу муносабат билан ўтказилган тантанали тадбирда вилоят ҳокими Хайрулло Бозоров иштирок этиб, президент ташаббуси билан мамлакатда тиббиёт соҳасини ривожлантириш, аҳоли, айниқса, она ва бола саломатлигини муҳофаза қилишга алоҳида эътибор қаратилаётганини таъкидлади. 

Қайд этилишича, янги бинодан вилоят аҳолиси учун репродуктив саломатлик маркази, консултатив поликлиника, 18 ўринли чақалоқлар реанимацияси, 20 ўринли кам вазнли ва чала туғилган чақалоқлар учун парвариш бўлими, шаҳар ҳамда туманлардан келаётган беморлар учун 20 ўринли чақалоқлар касаллиги бўлими ҳамда замонавий лаборатория жой олган.  

Мазкур замонавий муассасада чақалоқларга тор доирадаги мутахассислар томонидан тиббий ёрдам кўрсатиш ва болаларни катамнестик кузатувини олиб бориш имкони яратилган. 

Маълумот учун, ўтган 2022 йилнинг ўзида вилоятда 64 та тиббиёт муассасасида қарийб 150 миллиард сўмлик қурилиш-таъмирлаш ишлари амалга оширилган.