“Dori-darmon” aksiyadorlik kompaniyasi “Tutukon Neo ichish uchun eritma 250 ml” dori preparatidan ogoh bo‘lishga chaqirgandi.
Bu xabar “Daryo” nashri tomonidan 3-aprel kuni “O‘zbekistonda yana bir dori vositasidan foydalanish taqiqlandi” sarlavhasi ostida e’lon qilingan.
Dori vositalari, tibbiy buyumlar va tibbiy texnika ekspertizasi va standartlashtirish davlat markazi “Grand Medical Group AG” kompaniyasining “Tutukon Neo” dori vositasi chaqirib olingan seriyasiga oid ma’lumotlar “Daryo” tomonidan noto‘g‘ri talqin qilinganini qayd etdi.
Ma’lum bo‘lishicha, Ispaniyaning “Dori vositalari va tibbiy buyumlar agentligi” (AYeMPS) qaroriga binoan, Ispaniyaning Labaratorio Miquyel Y Garriga Inc, S.L. korxonasi tomonidan ishlab chiqarilgan “Tutukon Neo ichish uchun eritma 250 ml” (flakonlarda) dori preparatining “Zarur ishlab chiqarish amaliyoti (GMP)” talablari buzilgan holda ishlab chiqarilgani aniqlangan.
Sog‘liqni saqlash vazirligi huzuridagi Dori vositalari, tibbiy buyumlar va tibbiy texnika ekspertizasi va standartlashtirish davlat markazi yuqoridagi ma’lumotga asosan, respublika hududiga kirib kelgan quyidagi: R-049, R-050, R-051, R-078, R-080, R-222, R-236, R-081, R-124, R-204, R-205, R-206, R-218, R-219, R-220, R-221, R-223, R-224, R-225 seriyalarini farmatsevtika bozoridan muomaladan qaytarib olinayotganini ma’lum qilgan.
“Daryo” nashri rasmiy berilgan axborot noto‘g‘ri talqin qilingan xabarni e’lon qilgani uchun ishlab chiqaruvchi va jamoatchilikdan uzr so‘raydi.
Izoh (0)