Turkiya aviakompaniyasi Anqara—Toshkent o‘rtasida to‘g‘ridan to‘g‘ri reyslarni boshlaydi

Turkiyaning AnadoluJet aviakompaniyasi Anqara—Toshkent—Anqara yangi yo‘nalishini ochdi. Bu haqda Uzbekistan Airports matbuot xizmati xabar berdi.

Qayd etilishicha, birinchi yo‘lovchi reysi 2023-yil 17-aprelga belgilangan. Reyslar Boeing 737-800 samolyotlarida haftasiga bir marta — dushanba kunlari amalga oshirilishi rejalashtirilgan.

AnadoluJet — bosh qarorgohi Anqarada joylashgan Turkish Airlines loyihasi bo‘lgan aviakompaniya. Aviakompaniya parkida 59 ta samolyot mavjud bo‘lib, ular 89 ta yo‘nalishda ichki va xalqaro reyslarni amalga oshiradi.

Avvalroq Rossiya aviakompaniyasi Sochi—Urganch yo‘nalishi bo‘yicha to‘g‘ridan to‘g‘ri parvozlarini boshlashi, Hindiston aviakompaniyasi Dehli va Toshkent o‘rtasida qatnovlarni yo‘lga qo‘yishi, O‘zbekiston va Misr o‘rtasidagi aviaqatnovlar soni ko‘paytirilishi to‘g‘risida xabar berilgandi.