Ўзбекистон Таиланд билан одам савдоси ва ноқонуний миграцияга қарши кураш бўйича ҳамкорлик қилиши ва бу бўйича битим имзоланиши кутилмоқда.
Хабарга кўра, Ўзбекистоннинг Бангкок шаҳридаги Бош консуллиги томонидан Ички ишлар вазирлиги ва Таиланд Қироллик полицияси ҳамда одам савдоси учун масъул ташкилот — Ижтимоий ривожланиш ва инсон хавфсизлиги вазирлиги вакиллари иштирокида онлайн мулоқот ташкил этилди. Унда дастлаб вазирликлар фаолиятига доир ўзаро маълумот алмашилди.
Шунингдек, томонлар ўртасида ҳамкорликни мустаҳкамлаш мақсадида ҳуқуқий асос яратиш масаласи атрофлича муҳокама қилинди. Бу борада “Одам савдоси ва ноқонуний миграцияга қарши кураш бўйича ҳамкорлик тўғрисида” Ўзбекистон ва Таиланд ҳукуматлараро битими лойиҳасини ишлаб чиқишни жадаллаштириш, шунингдек, томонлар учун долзарб бўлган бошқа йўналишлар бўйича ўзаро англашув меморандумларини ишлаб чиқишга келишиб олинди.
Бундан ташқари, ўн миллионлаб хорижий сайёҳларни қабул қиладиган мамлакат сифатида Таиланднинг сайёҳлар хавфсизлигини таъминлаш бўйича тажрибасини ўрганиш мақсадида Ўзбекистон Ички ишлар вазирлиги делегациясининг Таиландга сафарини ташкил этишга келишилди. Бу йўналишда Таиланд Қироллик полицияси ўз мамлакати сайёҳлик полицияси иштирокида Ўзбекистон томони учун малака ошириш курсларини уюштиришга тайёр эканини билдирди.
Изоҳ (0)