Italiyada ingliz tili va boshqa xorijiy so‘zlardan foydalanganlik uchun 5000 yevrodan 100 ming yevrogacha jarimaga tortish bo‘yicha qonun loyihasi ishlab chiqildi. Bu haqda Euronews xabar berdi.
Bosh vazir Giorgi Meloni partiyasi a’zolariga ko‘ra, mazkur qonundan maqsad italyan tilini targ‘ib qilish, tilni hamda milliy o‘zlikni himoya qilishdan iborat. Qonunni Italiya parlamenti quyi palatasi deputati Fabio Rampelli ilgari surgan. U agar qonun qabul qilinsa, italiyalik siyosatchilar va byurokratlarning ”anglomaniya”siga qarshi ishlashini qayd etgan.
“Biz quyi palatada italyan tilida gaplashamiz. Ingliz tili o‘rniga o‘z tilimizdan foydalanish uchun kurashni davom ettirmoqdamiz. (Misol tariqasida) nima uchun qo‘lni avtomatik dezinfeksiyalovchi vositani ‘dispenser’ deb atashimizni tushunolmayapmiz”, — deb yozadi u.
Italiya tili boshqa Yevropa tillari kabi so‘nggi yillarda ko‘plab ingliz atamalarini o‘zlashtirdi. Ko‘pincha bu italyan an’analariga tegishli bo‘lmagan "yangi” narsalarni bildiruvchi atamalar (kompyuter, ijtimoiy tarmoqlar, masofaviy ish) hisoblanadi. Ingliz tili qisman atamalarning qisqaroq va ixcham versiyasini taklif qiladi, italyan tilida esa bu ancha uzun shaklda ifodalanishi mumkin.
Italiyaning Treccani ensiklopediyasida hozirda 9000 ta inglizcha so‘z va 80 0000 ta italyancha so‘z mavjud. 2000-yildan beri italyan tiliga kiritilgan inglizcha so‘zlar soni 773 foizga oshgan.
Izoh (0)