Yulian Nagelsmanning “Bavariya”dan iste’foga chiqarilishi va uning o‘rniga Tomas Tuxelning tayinlanishi yaxshigina shov-shuvlarga sabab bo‘ldi.
Bu ikki murabbiy 2016-yildan beri Bundesliga va Chempionlar Ligasi doirasida olti marta to‘qnash kelgan, biroq ilk bor ularning yo‘li 2007/08-yilgi mavsumda “Augsburg II”da kesishgan.
Vaqtni 16 yil orqaga qaytaramiz.
O‘shanda futbolchilik faoliyatini yakunlaganiga to‘qqiz yil bo‘lgan va “Shtutgart” yoshlar jamoasida ishlashga ulgurgan 33 yoshli Tuxel endigina “Augsburg II” boshqaruviga kelgandi.
Aynan o‘sha yerda yosh Yulian Nagelsmann katta futbolchi bo‘lish uchun intilardi. “U futbol haqida cheksiz gapirishi mumkin edi. Yulian o‘sha paytdayoq o‘zini va jamoani maydonda hamda undan tashqarida qanday qilib rivojlantirish haqida o‘ylardi”, — deya eslaydi o‘sha paytda Yulian bilan tanish bo‘lgan hujumchi Stefan Hayn.
Ko‘p o‘tmay Yulian jiddiy jarohat oldi va 20 yoshidayoq faoliyatini tugatishga majbur bo‘ldi. Shartnoma 2008-yilga qadar mo‘ljallangandi, o‘sha vaqtda Tuxel Nagelsmannga jamoada yangi rol topdi. “Klub menga maosh to‘lashda davom etdi va buning evaziga men raqiblarning o‘yinlarini tomosha qildim. Muqobil variant shartnomani bekor qilish edi, lekin men buni xohlamadim”, — deydi Yulian.
Birinchi kuzatgan jamoasi “Gerstxofen” bo‘lgan. “Qiz o‘rtog‘im o‘yinni kameraga suratga oldi va men bir vaqtning o‘zida qaydlar yozib bordim. Qog‘oz, qalam va kamera — butun to‘plamim shu edi. Tuxel qoyil qoldi, o‘zi ham raqibning o‘yinini ko‘rgani va shunga o‘xshash narsalarni payqaganini aytdi”, — degandi Yulian.
Nagelsmanning kuzatishlari “Augsburg II”ning 3:1 hisobida g‘alaba qozonishiga yordam berdi, hujumchi Hayn esa dublga erishdi. Shu tariqa Yulian klubdagi yangi roli unga katta zavq bag‘ishlashini anglab yetdi. “Bundan oldin men murabbiy bo‘lish haqida hech o‘ylamagandim. Aytish mumkinki, Tomas menga turtki berdi”, — deb tan olgandi Nagelsmann.
Mavsumning ikkinchi yarmidan boshlab Yulian Tuxelning yordamchisi etib tayinlandi, garchi amalda u skaut lavozimida faoliyat yuritgan bo‘lsa ham. Nagelsmann mashg‘ulot jarayonida deyarli ishtirok etmasdi.
Yulian va Tomas 2007/08-yilgi mavsum oxirida boshqa-boshqa yo‘llardan ketdi: Nagelsmann “Myunxen-1860” U-17 jamoasida yordamchi murabbiy sifatida ishlashni boshladi, Tuxel esa “Mayns” U-19 ga o‘tdi.
“Tuxel men uchun ikkinchi ota bo‘lgan deb ayta olmayman, garchi ko‘pchilik uni shunday atasa ham. Bizning munosabatlarimiz pragmatik edi”, — degandi Nagelsmann Tuxel bilan qisqa hamkorlikni eslab.
Izoh (0)