AQSHning janubiy va o‘rta-g‘arbiy shtatlarida kuchli bo‘ron va tornado qurbonlari soni kamida 32 kishiga yetdi, deb xabar bermoqda DW 2-aprel kungi ma’lumotlarga tayanib.
Memfisda kuchli shamol sabab bir necha uy ustiga daraxtlar qulaganidan so‘ng ikki bola va bir nafar katta yoshli kishi o‘lik holda topildi, deya xabar bermoqda Tennessi politsiyasi. Makneyri okrugida yana ikki kishi vafot etdi. Shanba kuni Tennessi shtatida yettita o‘lim haqida xabar berilgandi.
Indiana shtatida mahalliy tabiiy resurslar departamenti milliy bog‘dagi lagerda ikki kishi halok bo‘lganini ma’lum qildi. Avvalroq Arkanzas, Illinoys, Delaver, Missisipi va Alabama shtatlarida bo‘ron bilan bog‘liq hodisalarda yana 15 kishi halok bo‘lgani xabar qilingan edi.
AQSH prezidenti Jo Bayden va rafiqasi Jill falokat zonalaridan biri bo‘lgan Missisipi shtatiga tashrif buyurib, mahalliy aholi bilan uchrashdi hamda tornado oqibatlarini ko‘zdan kechirdi.
Bayden 2-aprel kuni Arkanzasda “katta falokat” haqida e’lon qilib, federal budjetdan yordam uchun mablag‘ ajratishni buyurdi.
Tornado butun mamlakat bo‘ylab 11 shtatda uylar va korxonalarni vayron qildi. Yarim millionga yaqin aholi elektr ta’minoti bilan bog‘liq qiyinchiliklarni boshdan kechirmoqda, deb ta’kidlaydi AP.
AQSH Milliy ob-havo xizmati ma’lumotlariga ko‘ra, 31-martdan beri mamlakatda 80 dan ortiq tornado qayd etilgan.
Izoh (0)