“Mashinamda joynamoz topilgani uchun bir yarim oy hisob berganman” — Yulduz Usmonova

Qo‘qon shahrida yoshlar tashabbusi bilan “Konstitutsiya o‘zimizniki” shiori ostida Konstitutsiyaviy qonun loyihasi bo‘yicha targ‘ibot tadbiri va konsert-shou dasturi bo‘lib o‘tdi. Bu haqda “Daryo” muxbiri xabar berdi.

Unda O‘zbekiston xalq artisti Yulduz Usmonova chiqish qilib, mashinasida joynamoz topilgani uchun bir yarim oy hisob bergani hamda og‘ir kunlarni boshidan o‘tkazgani haqida gapirdi.

“Oldin mening boshim g‘amdan chiqmas edi. Meni yaxshi bilasizlar. Xalqning haqqini talab qilib ham boshimda yong‘oq chaqilgan. Men tengilar biladi buni. Har kim dinini kuylagisi, dinida yashagisi keladi. Lekin u paytda qiyin edi. “Iymon” ashulasini aytmayman deb so‘z berdim, qo‘l qo‘ydim. Lekin aytaman, deganman, esingizda bormi? Balki 3-4 yil sahnaga chiqmasman degandim, ancha yil chiqmay ketdim.

Aytmoqchimanki, haqiqat bor, lekin haqiqatni himoya qilsangina bo‘ladi. Ro‘shnolik deydi, omon-omonlik bor, agar sen u uchun kurashsang, qiymatini bilsang bor. Sizning unvonlaringiz bo‘lgan, o‘sha payti rosa unvonlar olgansiz-ku, deyishadi. Meni unvonlarim bilan qo‘shib, qon qustirishgan.

Deputatlik paytimda farg‘onalik bir deputat odam oldimda o‘tirardi. “7 oydan beri xalq oylik olmayapti”, deganidan keyin o‘ligini ham, tirigini ham ko‘rmadim shu odamning.

Mashinamda joynamoz ko‘rib qolishgani uchun bir yarim oy hisob berganman. Do‘ppi kiyganning ham boshi baloga qolgan. Nechta odam yetmadi bugungi kunga. Nechtasi Qoraqalpog‘istonning cho‘lidagi qamoqxonada yo‘q bo‘lib ketdi, tuhmatlarga qolib. Namoz o‘qiganiga tuhmatga qolgani qancha. Bugun masjidlarimizda azon chaqirilyapti. Azon chaqirilgan yurtda barokat doim bo‘ladi. Bugun erkin nafas olyapmiz. Birdan to‘g‘onni ochib yuborsa, toshqin bo‘ladi. Sekin-sekin bersa, inson ozodlikka o‘rganadi.

Hayotda kamchiliksiz hech bir davlat yo‘q. Lekin bugun erkinligimizning qiymatini bilaylik. Mozorimiz ham, bozorimiz ham shu yerda. Shuning uchun, bu kunlar bizga kerak, erkinlik bizga kerak, odillik bizga kerak”, — dedi Yulduz Usmonova.