O‘zbekiston Liberal-demokratik partiyasi tomonidan “O‘zbekiston Respublikasi Konstitutsiyasi to‘g‘risida”gi konstitutsiyaviy qonun loyihasining mazmun-mohiyatiga bag‘ishlangan tashviqot tadbirlarining navbatdagisi O‘zLiDeP Qoraqalpog‘iston Respublikasi kengashi tashabbusi bilan Amudaryo tuman hokimligida tashkil qilindi.
“Biz ochiqlik va oshkoralikni tanlaymiz” shiori ostidagi ushbu tadbirda O‘zLiDeP Siyosiy Kengashi Ijroiya qo‘mitasi raisi Aktam Xaitov, senator Bahodir Tojiyev, Qoraqalpog‘iston Respublikasi Jo‘qorg‘i Kengesiga tumandan saylangan deputatlar, Xalq deputatlari tuman kengashi deputatlari, partiya faollari, o‘qituvchi, fermer va yoshlar ishtirok etdi.
Partiya yetakchisi hamda senator Bosh qomusimizga kiritilayotgan o‘zgartishlarning mazmun-mohiyati xususida tushunchalar berdi. Hujjat yurtimizda qonun ustuvorligini ta’minlovchi mustahkam xuquqiy poydevor — kelajagimizning ishonchli kafolati ekani, uni ishlab chiqishda keng jamoatchilik, siyosiy partiyalar, jamoat tashkilotlari, ekspertlik va ilmiy doira vakillari, ziyolilar faol ishtirok etganini bayon etishdi.
Loyiha umumxalq muhokamalariga qo‘yilganidan so‘ng, 220 mingdan ziyod takliflar kelib tushgani, ular e’tiborga olingan. Shunga ko‘ra yangilanayotgan Konstitutsiya tom ma’noda xalq Konstitutsiyasiga aylandi. Ushbu jarayonda partiya faollari ham o‘z takliflari bilan ishtirok etib, bidirgan takliflari loyihada o‘z aksini topganligi alohida e’tirof etildi.
.jpg)
Masalan, Konstitutsiya loyihasida davlatning bozor munosabatlarini rivojlantirish, qulay investitsiyaviy va ishbilarmonlik muhitini ta’minlash, halol raqobat uchun shart-sharoitlar yaratishi bo‘yicha majburiyatlari belgilanyapti.
Shuningdek, Konstitutsiyada barcha mulk shakllarining teng huquqliligi, tadbirkorlarning qonunchilikka muvofiq har qanday faoliyatni mustaqil tanlashi va amalga oshirishga haqli ekanligi kafolatlanishi katta ahamiyatga molik.
Mol-mulk, uy-joy daxlsizligi masalasini Bosh qomusimizda belgilash — partiyamiz a’zolari va elektorati uchun ayni muddao bo‘lyapti. Mol-mulk daxlsizligining yuksak darajada kafolatlanishi ishbilarmonlik va investitsiyaviy faollikni ham rag‘batlantiradi.
.jpg)
Tadbirda so‘zga chiqqan faxriy o‘qituvchi Tursunboy Abdullayev, 82-maktab direktorining ma’naviy-ma’rifiy masalalar bo‘yicha o‘rinbosari Mohira Yusupova, “Zulfiya” nomidagi davlat mukofoti sovrindori Barno Samandarova va boshqalar “O‘zbekiston Respublikasining Konstitutsiyasi to‘g‘risida”gi konstitutsiyaviy qonun loyihasi umumxalq referendumida ovozga qo‘yilishi va referendum joriy yilning 30 aprel kuniga belgilangani, ushbu tarixiy hodisaga befarq bo‘lmaslikni aytib, yangilanayotgan Konstitutsiya uchun ovoz berishga chaqirdi.
Ko‘tarinki ruhda o‘tgan tadbirda tuman madaniyat bo‘limi xonandalari Vatan, tinchlik haqidagi qo‘shiqlarni ijro etib, ishtirokchilarga xush kayfiyat ulashdi.
O‘zLiDeP Qoraqalpog‘iston Respublikasi
kengashi matbuot xizmati
Izoh (0)