“Машинамда жойнамоз топилгани учун бир ярим ой ҳисоб берганман” — Юлдуз Усмонова

Қўқон шаҳрида ёшлар ташаббуси билан “Конституция ўзимизники” шиори остида Конституциявий қонун лойиҳаси бўйича тарғибот тадбири ва концерт-шоу дастури бўлиб ўтди. Бу ҳақда “Дарё” мухбири хабар берди.

Унда Ўзбекистон халқ артисти Юлдуз Усмонова чиқиш қилиб, машинасида жойнамоз топилгани учун бир ярим ой ҳисоб бергани ҳамда оғир кунларни бошидан ўтказгани ҳақида гапирди.

“Олдин менинг бошим ғамдан чиқмас эди. Мени яхши биласизлар. Халқнинг ҳаққини талаб қилиб ҳам бошимда ёнғоқ чақилган. Мен тенгилар билади буни. Ҳар ким динини куйлагиси, динида яшагиси келади. Лекин у пайтда қийин эди. “Иймон” ашуласини айтмайман деб сўз бердим, қўл қўйдим. Лекин айтаман, деганман, эсингизда борми? Балки 3-4 йил саҳнага чиқмасман дегандим, анча йил чиқмай кетдим.

Айтмоқчиманки, ҳақиқат бор, лекин ҳақиқатни ҳимоя қилсангина бўлади. Рўшнолик дейди, омон-омонлик бор, агар сен у учун курашсанг, қийматини билсанг бор. Сизнинг унвонларингиз бўлган, ўша пайти роса унвонлар олгансиз-ку, дейишади. Мени унвонларим билан қўшиб, қон қустиришган.

Депутатлик пайтимда фарғоналик бир депутат одам олдимда ўтирарди. “7 ойдан бери халқ ойлик олмаяпти”, деганидан кейин ўлигини ҳам, тиригини ҳам кўрмадим шу одамнинг.

Машинамда жойнамоз кўриб қолишгани учун бир ярим ой ҳисоб берганман. Дўппи кийганнинг ҳам боши балога қолган. Нечта одам етмади бугунги кунга. Нечтаси Қорақалпоғистоннинг чўлидаги қамоқхонада йўқ бўлиб кетди, туҳматларга қолиб. Намоз ўқиганига туҳматга қолгани қанча. Бугун масжидларимизда азон чақириляпти. Азон чақирилган юртда барокат доим бўлади. Бугун эркин нафас оляпмиз. Бирдан тўғонни очиб юборса, тошқин бўлади. Секин-секин берса, инсон озодликка ўрганади.

Ҳаётда камчиликсиз ҳеч бир давлат йўқ. Лекин бугун эркинлигимизнинг қийматини билайлик. Мозоримиз ҳам, бозоримиз ҳам шу ерда. Шунинг учун, бу кунлар бизга керак, эркинлик бизга керак, одиллик бизга керак”, — деди Юлдуз Усмонова.