Toshkentda futbol o‘ynagani kelgan yigitlar o‘rtasida ommaviy janjal sodir bo‘lgani to‘g‘risida xabar berilgandi. Poytaxt IIBBning ma’lum qilishicha, holat yuzasidan jinoyat ishi qo‘zg‘atilgan.
Idora ma’lumotlariga ko‘ra, 26-mart kuni soat 23:00 larda voyaga yetmagan 18 yoshli Bahodir F. do‘stlari bilan Sergeli tumanida futbol o‘ynayotgan vaqtida, 21 yoshli Jasur R. va 20 yoshli Fazliddin M. ularga shovqin solmasligini aytib, eʼtiroz bildirgan. Natijada ular o‘rtasida og‘zaki janjal boshlangan va shu atrofdan o‘tib ketayotgan fuqarolar ularni ajratgan.
Oradan biroz vaqt o‘tib, soat 23:30 larda Bahodir F. va uning 22 yoshli akasi Baxtiyor R. Mirobod tumani Qo‘yliq-4 mavzesida Jasur R., Fazliddin M., 21 yoshli Ulug‘bek M., 19 yoshli Abror N. bilan janjallashgan. Janjal oqibatida Bahodir F. “chap kaft sohasi kesilgan jarohati, bosh sohasi shilinmasi” tashxisi bilan, Baxtiyor R. “BMYOJ, burun suyagi sinishi, yuz sohasi yirtilgan jarohati” tashxisi bilan kasalxonaga yotqizilgan.
Mazkur holat yuzasidan Mirobod tumani IIO FMB Tergov bo‘limi tomonidan Jinoyat kodeksining 277-moddasi (bezorilik) bilan jinoyat ishi qo‘zg‘atilgan. Gumon qilinuvchilar protsessual tartibda ushlangan. Tergov davom etmoqda.
Avvalroq poytaxt IIBB mazkur janjal oqibatida natijasida fuqarolar tan jarohati olmaganini ma’lum qilgandi.
Izoh (0)