Taniqli aktyor, xonanda Shohruxxonning otasi Alisher Yo‘ldoshev YouTube kanallaridan biriga bergan intervyusida o‘g‘lining bolaligi, qiziqishlari hamda uning yoshligida Farrux Zokirovdan fotiha olgani haqida gapirib berdi.
“Shohruxni ham teatrga olib kelgandim, sahnaga chiqib qarasam oldimda turibdi”
— Shohrux uch yoshligida diplom uchun spektakl topshirganman. Marhum professor Muhammadjon Rahmonov birinchi qatorda o‘tirar edi, o‘sha paytda Teatr va rassomchilik institutining rektori shu kishi bo‘lgan. Spektakl topshirayotgan vaqtimda ham birinchi qatorda o‘tirgan, rol o‘ynayotgandim. Shohruxni ham teatrga olib kelgandim, sahnaga chiqib qarasam oldimda turibdi. Kursdoshlarimga qarab tur, sahnaga chiqqan paytim chiqib ketmasin, degandim. Ular ham ish bilan bo‘lib ketgan, qarasam yonimda turibdi.
Qaradim-da, rolimni davom ettirib ketaverdim, spektakl tugagandan keyin o‘sha professor: “Bilasizlarmi, bitta inson rolini qoyilmaqom qilib o‘ynadi, qolgan hech qaysingiz rol o‘ynay olmadingizlar. Bolacha bor-ku, bitta shu yaxshi rol o‘ynadi”, — degan edi. O‘sha Shohruxxonning birinchi sahnaga chiqishi edi.
“Farrux Zokirov Shohruxga fotiha bergan”
— Shohrux ko‘pincha bizning oldimizda, gastrolda yurar edi. Uni Zebo bilan birga gastrolga olib borar edik, uning ham qiziqishi shundan boshlangan bo‘lsa kerak. Ashulalar aytar edi, uyimizning oldida Farrux Zokirov turar edi, borib undan fotiha olgan. Hali maktabga bormasdi, televizorlarda ko‘rib ustoz, menga fotiha bering, deb borgan. O‘sha paytda Farrux Zokirov Shohruxga fotiha bergan.
“Farzandning ko‘ngliga qarash kerak, bu uning xohishi”
— Shohrux mening katta o‘g‘lim, sirdoshim. U bir ish qiladigan bo‘lsa, men bilan gaplashadi, men biror ish qiladigan bo‘lsam, u bilan maslahatlashaman. Farzandning ko‘ngliga qarash kerak, bu uning xohishi. Hozir yaxshi yashashyapti, ikkita nevaram bor. Ularning turmushiga mening havasim keladi. Baribir Alloh peshanasiga nimani yozgan bo‘lsa, shu bo‘ladi. Kelinim ham yaxshi, el taniydi.
Izoh (0)