Gollivud aktyori Jonni Depp kutilmaganda Angliyadagi qishloqlardan biriga ko‘chib o‘tganini va u yerda tinch hayot kechirayotganini ma’lum qildi. Jonni Depp yaqinda bergan intervyularining birida Gollivudni Somersetdagi kichik qishloqqa almashtirgani haqida gapirib berdi.
“Men shunchaki xarakterli joylarni yaxshi ko‘raman. Turli joylarda har xil uylarim bor va ularning barchasi men uchun o‘ziga xos narsani anglatadi. Rostini aytsam, juda uyatchan insonman. Bu Britaniya va, ayniqsa, Somersetning ajoyib jihatlaridan biri. Shunchaki o‘zim bilan bo‘laman, bu esa yoqimli”, — deydi Depp.
Aktyorning so‘zlariga ko‘ra, bu qishloq aholisi uning dunyo bo‘ylab mashhurlikka erishganiga e’tibor bermaydi. Shuning uchun u bu yerda o‘zini juda qulay his etadi.
“Britaniyaliklar juda zo‘r va siz bilan haddidan oshmasdan, qo‘shnisidek salomlashadi. Insonlarning avtograf so‘rashiga yoki qisqa suhbat qurishni xohlashlariga qarshi emasman, biroq oila a’zolarim bilan vaqt o‘tkazganimda bu ishni qilishni istamayman. Do‘konga borganimda atrofimda selfiga tushmoqchi bo‘lgan insonlar bilan o‘ralgan holda xarid qilishim mumkin. Ma’lum bir nuqtaga qadar bunga qarshi emasman, biroq ba’zida bunday insonlarga juda ko‘p duch kelaman”, — deydi aktyor.
Izoh (0)