Samarqand va Toshkent viloyatida gazdan noqonuniy foydalanganlarga nisbatan jinoyat ishi qo‘zg‘atildi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar qildi.
Departamentning Samarqand viloyat boshqarmasi GTF Samarqand filiali xodimlari bilan hamkorlikda o‘tkazilgan tergovga qadar tekshiruvda, fuqaro L.S. Urgut erkin iqtisodiy zonasiga tegishli hududda ohak ishlab chiqarish hamda tovuq boqish faoliyati bilan shug‘ullanib, ohak pishirish pechlari va isitish tizimini gaz quvuriga yashirincha ulab, 729,9 ming kub tabiiy gazdan noqonuniy foydalangani aniqlangan.
Shu kabi, Departamentning Paxtachi tuman bo‘limi tomonidan ETK xodimlari bilan hamkorlikda o‘tkazilgan tergovga qadar tekshiruvda, fuqaro K.E. xonadonida tashkil etgan yashirin sexda elektr pechlarni umumiy foydalanishdagi elektr tarmog‘iga ulab, 430,2 ming kVt/s elektr energiyasidan noqonuniy foydalangan.
Departamentning Chinoz tuman bo‘limi tomonidan o‘tkazilgan tergovga qadar tekshiruvda, fuqaro E.D. “Nafis” MFYdagi uyida tashkil etgan issiqxonani umumiy foydalanishdagi gaz tarmog‘iga yashirincha ulab, 108 ming kub tabiiy gazdan noqonuniy foydalangani aniqlangan.
Ushbu qonunbuzilishlar oqibatida davlat va jamiyat manfaatlariga 875,8 million so‘m zarar yetkazilgan.
Mazkur holatlar yuzasidan Jinoyat kodeksining 169-moddasi (o‘g‘rilik) va 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) bilan jinoyat ishlari qo‘zg‘atilib, tergov harakatlari o‘tkazilmoqda.
Eslatib o‘tamiz, 12-martdan boshlab O‘zbekistonda elektr, issiqlik, gaz yoki vodoprovod tarmoqlarini talon-toroj qilish o‘g‘rilik deb belgilandi. Bu jinoyat uchun 5 yilgacha ozodlikdan mahrum qilish jazosi berilishi mumkin.
Izoh (0)