O‘zbekistonning uch hududida elektr va gazdan noqonuniy foydalanganlar 930 mln so‘mdan ziyod zarar yetkazdi
O‘zbekistonning uch hududi: Buxoro, Toshkent viloyati, Navoiy da elektr va gazdan noqonuniy foydalanganlar 930 mln so‘mdan ziyod zarar yetkazdi. Bu haqda Iqtisodiy jinoyatlarga qarshi kurashish departamenti axborot xizmati xabar berdi.
Xabarga ko‘ra, Bosh prokuratura huzuridagi departamentning Shofirkon tuman bo‘limi tomonidan ETK xodimlari bilan hamkorlikda o‘tkazilgan tergovga qadar tekshiruvda, “Pattaxon” MFYda yashovchi U.I. o‘z xonadonida tarkibida oltin zarralari mavjud bo‘lgan toshlarni maydalashga mo‘ljallangan yashirin sex tashkil etgani aniqlangan. U umumiy foydalanishdagi elektr tarmog‘iga o‘zboshimchalik bilan ulanib, 363,6 ming kVt/s elektr energiyasidan noqonuniy foydalangani maʼlum bo‘lgan.
Shuningdek, departamentning Vobkent tuman bo‘limi tomonidan ETK xodimalari bilan hamkorlikda o‘tkazilgan tergovga qadar tekshiruvda, “Pattaxon” MFYda yashovchi R.O. ham o‘z xonadonida tarkibida oltin zarralari mavjud bo‘lgan toshlarni maydalashga mo‘ljallangan yashirin sex tashkil etib, 383,6 ming kVt/s elektr energiyasidan noqonuniy foydalanganligi aniqlangan.
Shu kabi, departamentning Navoiy viloyat boshqarmasi tomonidan GTF xodimlari bilan hamkorlikda o‘tkazilgan tergovga qadar tekshiruvda, Quyi Zarafshon irrigatsiya tizimlari havza boshqarmasi huzuridagi nasos stansiyalari va energetika boshqarmasi masʼul shaxslari boshqarma maʼmuriy binosini hech qanday hujjatsiz gaz tarmog‘iga o‘zboshimchalik bilan ulab, 195 ming kub tabiiy gazdan noqonuniy foydalangani aniqlangan.
Bundan tashqari, departamentning Ohangaron tuman bo‘limi tomonidan ETK xodimlari bilan hamkorlikda o‘tkazilgan tergovga qadar tekshiruvda, “G.” UK rahbari N.B. qiyoslov ko‘rigi muddati o‘tgan va nazorat tamg‘alari bo‘lmagan elektr hisoblagichdan o‘zboshimchalik bilan foydalanib, 88,3 ming kVt/s elektr energiyasidan noqonuniy foydalangani aniqlangan.
Departamentning Bekobod shahar bo‘limi tomonidan ETK xodimlari bilan o‘tkazilgan tergovga qadar tekshiruvda, “M.Sh.” MCHJ rahbari J.X. MCHJga qarashli dala maydonidagi nasoslarni umumiy foydalanishdagi elektr tarmog‘iga o‘zboshimchalik bilan ulab, 74,4 ming kVt/s elektr energiyasidan noqonuniy foydalangani aniqlangan.
Shu bilan birgalikda, departamentning Buxoro shahar bo‘limi tomonidan o‘tkazilgan tergovga qadar tekshiruvda, “B.L.” MCHJ rahbari F.E. MCHJ qarashli ko‘p qavatli uyini umumiy foydalanishdagi suv quvuriga ichimlik suvi hisoblagichisiz o‘zboshimchalik bilan ulab, 108,7 ming kub ichimlik suvidan noqonuniy foydalangani aniqlangan.
Qayd etilishicha, ushbu qonunbuzilish holatlari oqibatida davlat va jamiyat manfaatlariga jami 931,8 million so‘m zarar yetkazilgan.
Mazkur holatlar yuzasidan Jinoyat kodeksining 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) bilan jinoyat ishlari qo‘zg‘atilib, tergov harakatlari o‘tkazilmoqda.
