Toshkentda ortiqcha undirilgan foyda solig‘i ortidan qator rahbarlar jazolandi
Soliq qo‘mitasi ijtimoiy tarmoqlarda Toshkent shahrida qayd etilgan foyda solig‘i bo‘yicha holatlarni zudlik bilan o‘rganib, tegishli mas’ullarga chora ko‘rdi. Bu haqda qo‘mita matbuot xizmati xabar berdi.
Ijtimoiy tarmoqlarda tadbirkorlarning hisob raqamlaridan pullar soliq organlari tomonidan noqonuniy ravishda yechib olinayotgani to‘g‘risida e’tirozlar tarqaldi. Holat DSQ tomonidan tezkor o‘rganilib, kamchiliklarga yo‘l qo‘yganliklari uchun Soliq qo‘mitasi masʼul nazorat departamenti boshlig‘i B.Muqimov va Toshkent shahar bo‘lim boshlig‘i O.Lutfullayev egallagan lavozimidan ozod etilgan.
Shuningdek, Toshkent shahar soliq boshqarmasi boshlig‘i Yu.Nasimjonov va boshqarma boshlig‘ining birinchi o‘rinbosari J.Mirpo‘latovning maxsus unvonlari bir pog‘onaga pasaytirilib, intizomiy jazo chorasi belgilangan. Soliq qo‘mitasi soliq to‘lovchilarga xizmat ko‘rsatish departamenti boshlig‘i X.Bazarovga nisbatan esa hayfsan intizomiy jazo chorasi tayinlangan.
Shu bilan birga, foyda solig‘i bo‘nak to‘lovlari hisobidan budjetga undirilgan ortiqcha mablag‘larni 28-mart kuni soat 13:00 ga qadar soliq to‘lovchilarga to‘liq qaytarish vazifasi belgilangan.
“Qayd etilgan holatlar bo‘yicha Toshkent shahar soliq organlarida maxsus boshqarma tomonidan xizmat tekshirishi o‘tkazish va natijalari bo‘yicha hujjatlarni huquqni himoya qilish organlariga yuborish vazifasi topshirildi”, — deyiladi xabarda.
