O‘zbek kino olamida asosan salbiy qahramonlarning mahoratli ijrochisi sifatida tanilgan aktyor Ulug‘bek Muhammadkarimov “Daryo” internet-nashriga eksklyuziv intervyu berdi. Intervyuni jurnalist Feruz Muhammad tashkillashtirdi.
Ulug‘bek Muhammadkarimov suhbat davomida doimiy salbiy rollarni ijro etgani sababli gumondor shaxsga aylanib qolgani haqida gapirib berdi.
“Meni faqat salbiy rollarga taklif qilishadi. Masalan: vahobiy, hizbiy hamda mafiyalarning obrazini gavdalantirib berishimni so‘rashadi. Men hozirda Nazarbekda turaman. Shaharga kelgan-ketganimda postdan o‘taman. Har safar organ xodimlari meni to‘xtatib, hujjatlarimni so‘rashadi. “Nimaga meni to‘xtatding, sababi bormi”, desam, “gumondor shaxsga o‘xshaysiz”, deyishadi. Postlarda doim bir xil xodimlar turmaydi. Ular tez-tez almashib turishadi. Nafaqat ular, ko‘chada kim bilan gaplashsam ham boshqacha gaplashadi. Ularning xotirasiga salbiy rollarim muhrlanib qolgan. Rejissorlar ham salbiy rol bo‘lsa, meni eslashadi. Menga ham boshqa rollar bersa, qoyil qilolmasak ham bundayroq bo‘lsa ham ijro etarman.
Nemislar bilan rus kinoijodkorlari O‘zbekistonda film suratga olishganida ham xorij filmlarida faqat salbiy rol ijro etganman. Qizig‘i, ruslarning serialiga kasting topshirganimdan so‘ng avariyaga uchradim, yuzim yirtilib ketgan edi. Ana shu paytda menga qo‘ng‘iroq qilib, “Keyingi haftadan suratga olish jarayonlari boshlanadi, sizga kostyum tikishimiz kerak”, deyishdi. Men avtohalokatga uchrab, yuzimni jarohatlab olganimni aytsam, “Qo‘l-oyog'ingiz butun bo‘lsa kelavering”, deyishdi. Borganimda rejissor meni ko‘rib, grim xonasiga jo‘natdi. U yerda men kissavurning rolini o‘ynashim kerak edi. Grimchi esa menga qarab, “senga grim shart emas, tayyor grim bilan kelibsan”, degan.
O‘sha filmlarda kuniga 200 dollar gonorar olganman. Yana bir Rossiya tomonidan ishlangan kinoda ruslarning mashinasiga bomba qo‘yadigan afg‘on roli bilan chiqqanman. Undan tashqari, bir necha yil avval meni vahobiylar haqidagi hujjatli filmga taklif qilishdi. Bahriddin aka degan rejissor menga vahobiylar rolini o‘ynab berasan, deb aytdilar. Ana shu film birinchi prezidentimiz Islom Karimovning buyrug‘i bo‘yicha bo‘lgani uchun tepamizda ijodiy guruhdan tashqari ko‘plab rahbarlar turardi.
Ssenariyni o‘qib, har xil repetitsiya qilib tursam, tepamga bittasi kelib, “Qanday yozilgan bo‘lsa, shunday o‘qib ber, birorta ham so‘zi qolib ketmasin”, deb aytdi. Qarasam bitta yigit turibdi. Ana o‘shanda “Menga qara, sen kimsan? Sur bu yerdan”, deb aytdim. Chiqib rejissordan suratga olish maydonchasida faqat filmga taalluqli odamlar qolishini talab qilganman”, — deydi aktyor.
“Insonlarning nigohidan ular menga qanday qarayotgani sezilib turadi”
— “Afv” filmida ham g‘alamis odam rolini o‘ynab chiqdim. U yerda bosh qahramonlarga zararim tegar edi. Suratga olish jarayonlari sovuqda bo‘layotgandi, meni kaltaklashadigan sahnada kaltak yeyotgan insonni yuz qiyofasini ko‘rsatib bersam, operator chindan ham meni qiynalyapti deb o‘ylab, kamerasini o‘chirdi-da, “yordam beringlar”, deb boshqalarni yordamga chaqirdi. Keyin esa operatorga “Bekor to‘xtatding, menda hammasi joyida edi”, deganman.
Loyga bulg‘anib, oyoq tagida qolgan vaqtingiz kamerachilar to‘xtab qolsa, chatoq bo‘lar ekan. Yaqinda “Qodirxon” serialida ham suratga tushdim. U yerda ham salbiy obrazda edim, suratga tushgan sahnalarim ikki kun o‘tib efirga ketgani uchun meni ko‘pchilik tanib qoldi.
Meni tanigan insonlar o‘ynagan salbiy rollarimga nafrat bilan qaragani sabab meni ham yomon ko‘rib qolgan. Insonlarning nigohidan ular menga qanday qarayotgani sezilib turadi. “Sizning ijrongiz ishonarli chiqqani uchun tomoshabinlar shunday fikrga kelib qolgan”, deb aytganlar ham bo‘lgan. Ko‘p aktyorlarni kinoga taklif qilishganida agar obraz yoqmasa, ular bormaydi. Menda esa unday bo‘lmagan, “pulini bersa o‘ynab beraman”, deganman. Keyin qarasam, menga faqat shunaqa rollar beradigan bo‘lishdi.
Mening oldimga ham chiroyli qizni qo‘yib, qo‘limga gul berib, “Anavi qizga sevgi izhor qiladigan joyingiz, ko‘rsatib bering” deyishsa, men ham shu ishni qilolaman. Lekin negadir rejissorlar meni boshqacharoq rollarda sinab ko‘rishdan, tasavvur qilishdan qochadi. Shunaqa gaplar.
Ma’lumot uchun, Ulug‘bek Muhammadkarimov 1970-yil 18-avgust kuni Toshkent shahrida dunyoga kelgan. Teatr va rassomchilik institutining aktyorlik yo‘nalishida ta’lim olgan. Oilali, to‘rt farzandning otasi.
Batafsil reportajni quyida tomosha qilishingiz mumkin.
Izoh (0)