“Tolibon”ning ezgulikni targ‘ib qilish va illatlarning oldini olish bo‘limi Navro‘z bayramini Sevishganlar kuni bilan tenglashtirdi. Bu haqda Sputnik Afg‘oniston xabar berdi.

Ma’lum qilinishicha, Daykundi viloyati Kiti tumanida axloq politsiyasi shunday e’lon chiqargan. Unda Navro‘z bayrami Sevishganlar kuniga tenglashtiriladi. “Tolibon” musulmonlarda faqat ikkita bayram: Ro‘za hayiti (Iyd al-Fitr) va Qurbon hayiti (Iyd al-Adha) borligini ta’kidlagan. Shu bilan birga, “Tolibon” xabarida Navro‘z islomgacha bo‘lgan jaholatdan kelib chiqqanligi aytiladi.

“Kofirlarning bayramini nishonlaganlar, ulardan biri bo‘ladi. Shuning uchun Kiti viloyatida Navro‘z bayramini nishonlaganlar shariat bo‘yicha javobgarlikka tortiladi”, — deydi “Tolibon”ning axloq politsiyasi.

Ma’lumot o‘rnida, “Tolibon” ma’muriyati 2022-yil Navro‘z davlat bayrami emasligini, ammo uni nishonlashga to‘sqinlik qilmasligini bildirgandi. “Biz Navro‘zni rasman nishonlayotganimiz yo‘q. Agar odamlar uni nishonlashsa, ularga to‘sqinlik qilmaymiz”, — degan edi “Tolibon”.