O‘zbekiston Iqtisodiyot va Moliya vazirligining g‘azna hisob raqamlari Markaziy bankning tezkor to‘lov tizimiga integratsiyalashtiriladi. Natijada to‘lovlarni 24/7 rejimida amalga oshirish mumkin bo‘ladi. Bu haqda Markaziy bank boshqarma boshlig‘i Xushvaqt Azizov “Daryo” nashriga bergan intervyusida aytdi.
Aholi tomonidan to‘lovlarni amalga oshirishda qo‘shimcha qulayliklar yaratishga doir prezident qarori qabul qilindi. Hujjatda to‘lovlar bilan bog‘liq bir qator masalalarni hal qilish belgilangan. Xushvaqt Azizovning ta’kidlashicha, qarorda belgilangan muhim yangiliklarda biri – dam olish kunlarida ham to‘lovlarni davlat g‘azna hisob raqamidan amalga oshirish imkoni yaratilishidir.
“Iqtisodiyot va Moliya vazirligining g‘azna hisob raqamlaridan to‘lovlarni amalga oshirish imkoniyati mavjud emas edi. Prezident qaroriga muvofiq, Markaziy bankning tezkor to‘lov tizimiga integratsiyalashtirish natijasida to‘lovlarni 24/7 rejimida amalga oshirish mumkin. Yaʼni dam olish kunlarida ham istalgan to‘lovlarni g‘azna hisob raqamidan amalga oshirish mumkin bo‘ladi. Bu bank ish kuniga taalluqli bo‘lmaydi. Yaʼni mablag‘lar onlayn rejimda, tezkorlik bilan to‘lanadi.
Masalan, budjet tashkilotlari xodimlarining oylik - ish haqini to‘lash sanasi bayram kunlariga to‘g‘ri kelsa, Moliya vazirligida moliyalashtirish imkoniyati bo‘lmaydi. Chunki bayram yoki dam olish kunlari banklar ishlamaydi. Shuning uchun to‘lov qilib bo‘lmaydi. Qarorda ko‘rsatilganki, 24/7 rejimda tezkor to‘lov tizimiga ulanganidan keyin, dam olish kunlarimi, boshqa kunlarimi, oylik ish haqlarini o‘tkazib berish imkoniyati yaratiladi. Aynan “oyning oxiri, shanba yoki bayram kunlariga to‘g‘ri keldi. Bank ertasi kuni ishlamas ekan”, degan muammolar bo‘lmaydi. Tezkor to‘lov tizimiga ulanish orqali, masala o‘sha kunning o‘zida hal bo‘ladi”, – dedi u.
Avvalroq qarorda belgilangan boshqa masalalar ma’lum qilingandi.
Izoh (0)