U-20 Osiyo Kubogi finaliga chipta sotib olish uchun uzun navbatlar yuzaga keldi. iTicket da chiptalar yo‘q, boshqa platformalarda esa 300-500 ming so‘mdan sotilmoqda

Futbol bo‘yicha 20 yoshgacha bo‘lgan futbolchilar o‘rtasidagi 2023-yilgi Osiyo Kubogi finali 18-mart, shanba kuni o‘tkaziladi.

O‘zbekiston U-20 terma jamoasi sovrin uchun Iroqqa qarshi bahs olib boradi. Uchrashuv Toshkentdagi “Bunyodkor” stadionida o‘tkaziladi va 19:00 da boshlanishi ko‘zda tutilgan.

“Bunyodkor” stadioni kassalarida mazkur o‘yin uchun chiptalar olishga muxlislar kassa oldida to‘planib turgani aks etgan videolar tarqaldi. 

iTicket platformasida esa final chiptalari o‘yindan bir kun oldin sotib bo‘lingani ma’lum qilindi.

OLX saytida esa chiptalar 200, 300 va 500 mingdan sotilmoqda. 

Eslatib o‘tamiz, Toshkentda o‘tgan U-23 Osiyo Kubogi—2022 finali doirasida kechgan O‘zbekiston va Saudiya Arabistoni terma jamoalari o‘rtasidagi bahs oldidan “Bunyodkor” stadioni chiptaxonasi atrofida ko‘plab muxlislar to‘plagan va tartibsizliklar yuzaga kelgandi. Keyinroq O‘FA bu borada bayonot bergandi.