Yoshlar siyosati va sport vazirligida O‘zbekiston sambo assotsiatsiyasining navbatdagi hisobot-saylov konferensiyasi bo‘lib o‘tdi.
Tadbir kun tartibidan assotsiatsiya rahbariyatining so‘nggi 4 yillik faoliyati bo‘yicha hisoboti, tashkilotga yangi rais va bosh kotib saylash masalalari o‘rin oldi.
Assotsiatsiya raisi Alisher Alimov so‘nggi 4 yillik faoliyati bo‘yicha hisobotini taqdim qildi. Unda ushbu davrda sambo bilan shug‘ullanuvchilar soni ortgani, O‘zbekistondagi Olimpiya harakatida o‘z o‘rniga ega bo‘layotgani, qolaversa, Toshkentda Osiyo va Jahon chempionatlari muvaffaqiyatli o‘tkazilgani xususida to‘xtaldi. Hisobot delegat a’zolari tomonidan qabul qilingach, kun tartibidagi asosiy masalaga o‘tildi.
Unga ko‘ra, assotsiatsiya raisligiga tashkilotning viloyat bo‘limlari tomonidan amaldagi rahbar Alisher Alimov nomzodi ilgari surildi va bir ovozdan qo‘llab-quvvatlandi. Shu tariqa, Alimov navbatdagi muddatga O‘zbekiston sambo assotsiatsiyasining raisi etib saylandi. Shuningdek, Roman Shakirov yana 4 yil davomida assotsiatsiya bosh kotibi vazifasini bajaradigan bo‘ldi.
Izoh (0)