Ёшлар сиёсати ва спорт вазирлигида Ўзбекистон самбо ассоциациясининг навбатдаги ҳисобот-сайлов конференцияси бўлиб ўтди.
Тадбир кун тартибидан ассоциация раҳбариятининг сўнгги 4 йиллик фаолияти бўйича ҳисоботи, ташкилотга янги раис ва бош котиб сайлаш масалалари ўрин олди.
Ассоциация раиси Алишер Алимов сўнгги 4 йиллик фаолияти бўйича ҳисоботини тақдим қилди. Унда ушбу даврда самбо билан шуғулланувчилар сони ортгани, Ўзбекистондаги Олимпия ҳаракатида ўз ўрнига эга бўлаётгани, қолаверса, Тошкентда Осиё ва Жаҳон чемпионатлари муваффақиятли ўтказилгани хусусида тўхталди. Ҳисобот делегат аъзолари томонидан қабул қилингач, кун тартибидаги асосий масалага ўтилди.
Унга кўра, ассоциация раислигига ташкилотнинг вилоят бўлимлари томонидан амалдаги раҳбар Алишер Алимов номзоди илгари сурилди ва бир овоздан қўллаб-қувватланди. Шу тариқа, Алимов навбатдаги муддатга Ўзбекистон самбо ассоциациясининг раиси этиб сайланди. Шунингдек, Роман Шакиров яна 4 йил давомида ассоциация бош котиби вазифасини бажарадиган бўлди.
Изоҳ (0)