Buyuk Britaniya, Shveysariya va Fransiya: Gulnora Karimova ko‘chmas mulk uchun 240 mln dollar sarflagani ma’lum bo‘ldi

Gulnora Karimova poraxo‘rlik va korrupsiya yo‘li bilan qo‘lga kiritilgan mablag‘ evaziga Buyuk Britaniya kompaniyalaridan uy va samolyot sotib olishda foydalangan. Bu haqda The Freedom For Euroasia hisobotiga tayanib BBC xabar bermoqda.

Ma’lum bo‘lishicha, O‘zbekistonning birinchi prezidenti Islom Karimovning qizi Gulnora Karimova Londondan Gongkonggacha ko‘chmas mulklar uchun 200 mln funt yoki 240 mln dollar sarflagan. 

Oksford universiteti tadqiqotchisi Tom Meyn Karimova ishini barcha davrlardagi eng yirik poraxo‘rlik va korrupsiya holatlaridan biri deb atagan. 

Biroq Karimova va uning sheriklari korrupsion mablag‘lar evaziga qo‘lga kiritilgani aytilayotgan mulkning bir qismini allaqachon sotib yuborgan.

Freedom For Eurasia ma’lumotlariga ko‘ra, Gulnora Karimova Buyuk Britaniya, Shveysariya, Fransiya, Dubay va Gonkongda jami 14 ta ko‘chmas mulkka egalik qilgan. 

Ta’kidlanishicha, birgina Buyuk Britaniyaning o‘zida u umumiy qiymati 50 million funtlik beshta uy sotib olgan. Ulardan biri Bukingem saroyining g‘arbiy qismida joylashgan xususiy ko‘lga ega Surrey malika uyi bo‘lgan. 

Freedom For Eurasia hisobotida London va Britaniya Virjiniya orollaridagi firmalar nomi tilga olingan. Ular Karimova va uning sheriklariga jinoyat orqali olingan daromadlarni sarflash uchun xizmat qilgan.

Rustam Madumarov va hozirda Karimovaning sheriklari ekani aytilayotgan boshqalar rasmiy hujjatlarda Buyuk Britaniya, Gibraltar va Virjiniya orollari joylashgan kompaniyalarning “benefisiar egalari” sifatida qayd etilgan. 

Hisobotda Karimovaga aloqador ikkita Buyuk Britaniya kompaniyasi — Panally va Odenton Management alohida ko‘rsatilgan. Ularga buxgalteriya xizmatlarini SH Landes firmasi taqdim qilgan.

Ushbu firma keyinchalik Madumarov orqali 40 mln dollarga shaxsiy samolyot sotib olinganini, pullar O‘zbekistonda joylashgan  “O‘zdonrobita” mobil telefon kompaniyasidan kelganini ma’lum qildi. 

Aynan 2004-yillarda OAVda Gulnora Karimova tomonidan soxta hisob-fakturalar yordamida “O‘zdunrobita”dan 20 million dollar pul o‘tkazilgani haqida xabarlar tarqalgan edi.