Европа Иттифоқи Россиянинг нефть даромадларини яна 650 миллион долларга қисқартиради — Bloomberg

Польша, Литва ва Эстония ҳукумати Европа Иттифоқининг қолган аъзоларига Россия нефть нархига чегарани бир баррел учун 60 доллардан 51,45 долларга туширишни таклиф қилди. Бу ҳақда Bloomberg хабар берди.

Маълумотларга кўра, январь ойида Россиянинг нефть сотишдан тушган даромади 13 миллиард долларни ташкил этган.

Уч давлат вакилларининг фикрига кўра, таклиф Россиянинг нефть экспортидан тушадиган даромадларини ойига 650 миллион долларга камайтиради, чунки қарор амалга оширилса Uralsнинг бир баррел нархи мавжуд бозор нархларидан 5 фоизга пасаяди.

Варшава ва Вилнюс Россия нефти нархини 51,45 долларгача пасайтириш тарафдори эканлиги ҳақида Польшанинг RMF FM радиоси ҳам манбаларга таяниб хабар берди.

Польша дипломатлари бир баррел нефть учун амалдаги 60 доллар чегарасини Россия учун жуда фойдали деб ҳисобламоқда.

Россия Молия вазирлиги маълумотларига кўра, 2023 йил январь—февраль ойларида Urals нефтининг ўртача нархи бир баррел учун 49,52 долларни, февралда 49,56 долларни ташкил этди.

Ғарб давлатлари томонидан Россияда ишлаб чиқарилган нефть нархини бир баррел учун 60 долларгача чеклаш 5 декабрдан кучга кирди.

Нархлар чегараси G7 мамлакатлари (АҚШ, Буюк Британия, Германия, Франция, Канада, Италия ва Япония), шунингдек, Австралия ва Европа Иттифоқи томонидан тасдиқланган. Кейинчалик шартномага Норвегия ва Швейцария қўшилди.

Аввалроқ Путин ўзининг рухсатисиз нефть маҳсулотларини юқори нарх чегарасида экспорт қилишни тақиқлагани ҳақида хабар берилганди.